Defensor Públiku Jerál, Câncio Xavier. Imajen Tatoli/Nelson de Sousa

DILI, 09 setembru 2020 (TATOLI)- Defensor Públiku Jerál, Câncio Xavier, hateten, Defensoria Públika (DP) tau ona planu hodi prevee iha orsamentu jerál Estadu (OJE) tinan 2020, ba vaga promosaun no progresaun ba defensór ho ofisial justisa.

Câncio Xavier hateten, planu ba vaga internu promosaun  ne’e ba defensór na’in-neen  no ofisial justisa na’in-11.

Nia hatutan, razaun hodi halo promosaun no progresaun hodi aumenta  klase ba defensór  no eskalaun ba ofisial sira   hodi inspira  sensibiliza servisu sira ne’ebé sira presta  ho  di’ak liután ba serve nasaun no povu. Nune’e, ho  promosaun no progresaun ne’e sei iha efeitu ba mudansa remuneratóriu ba autor judisiál hirak ne’e.

“Vaga ne’e ba defensór sira sei haree husi antiguidade por méritu no ofisial sei haree husi avaliasaun dezempeñu rasik no sei liu husi teste,” hateten Defensór Públika Jerál, Câncio Xavier, ohin, ba Agência Tatoli iha nia kna’ar fatin, Dili.

Nia hateten, tuir estatutu vaga promosaun ba defensór parte DP rasik sei hala’o no ba ofisiál sira ne’ebé servisu iha administrasaun sei halo koordena ho parte Komisaun Funsaun Públika (CFP).

Defensoria Públika antes ne’e, iha defensór públiku hamutuk na’in-36, husi númeru ne’e ho nia kompozisaun na’in-tolu mak assume kargu hanesan Defensor Públiku Jerál, Defensor Inspektór, Defensor Adjuntu no Defensor Sergio Hornai ba fali asume kargu Komisáriu Anti-Korrupsaun, inklui na’in-ida mak mate ona.

Portantu númeru efetivu Defensór titular ne’ebé kaer prosesu daudaun na’in-31, ne’ebé iha Munisípiu Dili na’in-19, Suai (5), Baucau (7), no Oe-Cusse na’in-rua (2). Tantu, ofisial justisa  iha  servisu Defensoria Públika iha Munisípiu Dili, Suai, Baucau no Oe-Cusse hamutuk efetivu hamutuk  na’in-75.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here