Karreta Estadu hosi Ministériu Administrasaun Estatál (MAE) nian ne’ebé EFK halo apreensaun iha loron finadu. Imajen/foti hosi pájina Facebook CAC

DILI, 05 novembru 2020 (TATOLI)- Ekipa Fiskalizasaun Konjunta (EFK), kompostu hosi Polísia Nasional Timor-Leste (PNTL), Diresaun Nasionál Transportes no Terrestre (DNTT), Diresaun Nasionál Patrimóniu Estadu (ministériu Finansas), Komisaun Funsaun Publika (CFP) no Komisaun Anti-Korrupsaun (CAC) sei manda karta xamada ida ba membru Governu no  funsionáriu públiku sira ne’ebé identifika utiliza patrimóniu Estadu durante loron finadu.

Notísia Relevante : SETP rekoñese pesoál funsionáriu uza patrimóniu Estadu iha finadu

Komisáriu CAC, Sergio Hornai dehan, ekipa EFK sei halo enkontru hodi diskute mós prosesu fó karta xamada ba vise ministru, sekretáriu estadu no kargu xefia, inklui funsionáriu públiku sira ne’ebé EFK halo apreensaun ba sira-nia transporte atu kumpre regra no selu infrasaun ba Estadu tuir lei.

Komísariu CAC, Sergio Hornai. Imajen Tatoli/António Gonçalves

“Lei aplika ba ema hotu, ema ne’ebé maka uza sasán Estadu ninia ho ninia fins la loos la apropriadu ba servisu, entaun ne’e fó prejuízu ba Estadu ba iha kombustivel, no prosesu manutensaun,” Komisáriu KAK, Sergio Hornai hateten  ba jornalista, ohin, iha edifísiu Ministériu Defeza, Fatuhada, Dili.

Nia dehan, kritika sira ne’ebé sosiedade Timor-Leste lansa iha média sosiál Facebook kona-ba membru Governu no funsionáriu Estadu utiliza transporte Estadu ba atividade privadu ne’e hanesan xamada pozitivu ba servidór Estadu hotu- hotu atu kumpre regra hodi kontrola no kuidadu kualkér patrimóniu Estadu atu utiliza tuir regra loloos.

“Lei dehan membru Governu iha priviléjiu hanesan mós ha’u komisáriu, maibé ha’u labele uza karreta Estadu ba para fali iha tasi ibun, festa ka lia-mate no lia-moris. Se asuntu privadu, ha’u tenke buka mikrolete ka taxi hodi ba. Tanba ida ne’e maka dehan, onestidade, responsabilidade, iha plena ba buat ida naran paixaun, nasionalizmu no patriotizmu, entaun karreira ne’e tau iha ita-nia boas prátika, anaunsér por koinsidénsia ruma, família mate maibé iha tempu servisu hela,” Sergio Hornai hateten.

Komisáriu Segio lia tun tan, se ema hotu hatene patrimóniu Estadu no buat ida pekulatu de uzu ne’e, labele uza arbiru, maibé uza ba apropriadu para nia fins ne’e mós apropriadu ba interese públiku ninian.

“Sai hanesan lider ida, ita mós iha kódigu konduta, ne’ebé ita iha responsabilidade ida iha ita-nia servisu fatin, família no sosiedade, maibé kuandu sosiedade julga ita ne’e buat ne’ebé ladi’ak. La’ós adverténsia, mais ita presiza halo melloramentu ida ne’ebé di’ak. Ne’ebé ha’u komisáriu ida ha’u iha direitu atu uza karreta ne’e, mais nia fins ba vizita ha’u-nia avó-nia rate ne’e la’ós komisáriu nian,” Sergio Hornai esplika.

Nia hatutan ekipa konjunta sei kontinua hola medida ba kualkér funsionáriu atu responsabiliza aktu ne’ebé sira halo atu labele repete iha futuru.

Tuir kódigu penál artigu 296 ko’alia kona-ba pekulatu ho uzu katak, funsionáriu ne’ebé uza ka husik ema seluk uza ba fim ne’ebé la tama iha nia destinu veíkulu ka koiza movel seluk ho valór signifikativu, ne’ebé tama iha nia liman ka nia bele kaer tanba nia funsaun, atu hetan ba nia ka ba ema-seluk benefísiu ilejítimu ka hamosu prejuizu ba ema ruma, sei hetan pena prizaun to’o tinan-rua (2), kuandu buat sira ne’e tama iha nia liman ka nia bele kaer tanba nia funsaun.

Ekipa Fiskalizasaun Konjunta (EFK) halo apreensaun ba motorizada Estadu ho matrikula G ka GA hamutuk 18 no karreta Estadu rua (2).

Kazu infrasaun hirak ne’e akontese iha Munisípiu Dili no seidauk halo identifikasaun ba munisípiu 11 inklui RAEOA-Oecuse.

EFK rasik rejista iha infrasaun ne’ebé komete envolve Xefe Gabinete Interinu Sekretáriu Estadu Terras no Propriedade, Hilario Gusmão Fraga halo despaxu ba funsionáriu sira hodi utiliza   motór Estadu ba partisipa loron finadu.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here