Ministru Ensinu Superiór, Siénsia no Kultura, Longuinhos dos Santos. Imajen TATOLI/Egas Cristovão

DILI, 21 dezembru 2020 (TATOLI)Ministériu Ensinu Superiór, Siénsia no Kultura (MESSK) simu no analiza ona relatóriu eleisaun Reitór foun Univercidade Nacional Timor Lorosa’e (UNTL) hafoin lori ba Konsellu Ministru (KM) hanesan proposta husi ministériu.

“Ha’u simu ona relatóriu eleisaun Reitór UNTL foun iha sesta semana kotuk. Ita sei analiza relatóriu eleisaun ne’e hafoin haruka ba Konsellu Ministru atu fó apresiasaun no dekreta,” Ministru Ensinu Superiór, Siénsia no Kultura, Longuinhos do Santos, hateten iha Palásiu Governu, segunda ne’e.

Notísia Relevante: João Martins eleitu ba Reitór UNTL

Tuir Governante ne’e katak prosesu normál hili Reitór foun ne’e liuhosi eleisaun membru Konsellu Jerál UNTL no haruka relatóriu ba MESSK atu analiza no submete ba Konsellu Ministru.

Iha loron 3 dezembru, estrutura Konsellu Jerál UNTL hili ona João Soares Martins, nu’udar Reitór UNTL foun ba períodu tinan lima, 2021 to’o 2026 liuhosi eleisaun ho votus a-favór 10.

Membru estrutura Konsellu Jerál UNTL hamutuk na’in-12 maka iha diretu fó votu ba kandidatu na’in-tolu maka hanesan Reitór eleitu João Soares Martins ho votu 10, Reitór sesante Francisco Miguel Martins ho votus 2 no Acacio Cardoso Amaral 0.

Hafoin eleitu, Reitór foun João Soares Martins, husu ba estrutura hotu atu koopera malu hodi dezenvolve universidade públiku ne’e.

Reitór ne’e iha planu, atu investe maka’as iha área laboratóriu hodi hadi’a kualidade ensinu aprendizajen ba estudante sira.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here