Komandante Jerál Polísia Nasionál Timor-Leste (PNTL), Komisáriu Faustino da Costa. Imajen Tatoli/Eugénio Pereira

DILI, 11 dezembru 2020 (TATOLI)- Komandante Jerál Polísia Nasionál Timor-Leste (PNTL), Komisáriu Faustino da Costa, deklara posibilidade PNTL sei halo tan identifikasaun ba suspeitu balun ba kazu ligasaun internet ilegál.

Notísia Relevante : Tribunál aplika TIR ba Prezidente ANC

Komisáriu Faustino da Costa, la fó sai suspeitu sira-nia identidade, maibé  nia garante katak  parte Servisu Investigasaun Kriminál (SIC) sei halo prosesu investigasaun no rekolla evidénsia balun tan.

“Prosesu investigasaun sei la’o hela, ita hein de’it,” Komisáriu Faustino da Costa, hateten ba jornalista iha Sentru Formasaun Polísia, Comoro, kinta (10/12).

SIC ezekuta mandadu tribunál hodi detein jestór prinsipál kompañia Elite Computer no jestór prinsipál  operadór Telekomunikasaun Telemor no investiga Prezidente Autoridade Nasionál Komunikasaun (ANC) ne’ebé deskonfia halo korrelasaun servisu fornese rede koneksaun internet ilegál hosi Atambua, Indonézia mai Timor-Leste.

Antes ne’e, Tribunál Distritál Dili liuhosi primeiru interrogatóriu kondena suspeitu nu’udar jestór prinsipál Telemor ho inisiál  TVB no jestór prinsipál Eleite Computer ho inisiál DP komete kazu burla informátika no kazu fraude fiskál.

Suspeitu na’in-rua ne’e  kumpre hela prizaun preventiva hodi hein prosesu investigasaun.

Kazu prezidente ANC, João Oliveira Freitas, Tribunál Distritál Dili liuhosi desizaun julgamentu primeiru interrogatóriu  aplika Termu Identidade Rezisténsia (TIR) hodi hein prosesu investigasaun.

Ministériu Públiku nu’udar na’in ba asaun penál kondena Prezidente ANC, João komete  krime lima, hanesan administrasaun danoza previstu iha artigu 274, korrupsaun pasiva iha artigu 292, brankamentu kapitais previstu iha artigu 313, burla informátika agravadu ne’ebé previstu no punida iha artigu 292, no krime fraude fiskál iha artigu 314, hotu- hotu hosi kódigu penál Timor-Leste.

 Jornalista  : Eugénio Pereira

Editór         : Francisco Simões

HAKEREK NO HATÁN

Please enter your comment!
Please enter your name here