DILI, 21 dezembru 2020 (TATOLI)—Embaixadór Austrália iha Timor-Leste, Peter Roberts, hateten servisu Laboratóriu Nasionál daudaun ne’e iha ona kapasidade hodi halo teste COVID-19 ba ema na’in 200 kada loron.
Diplomata Austrálianu dehan asuntu ne’e bainhira partisipa serimonia inagurasaun sala Laboratóriu Patolojia Klínika no Mikrobiolojia iha Bidau, segunda ne’e.
Notísia Relevante :MS inagura laboratóriu patolojia iha LABNAS
“Banhira ita haree filafali iha teste inisiu ita haruka amostra ba iha Darwin Austrália no momemtu estabelese kapasidade iha Timor-Leste ita bele halo teste oituan iha loron ida maibé ohin loron bele iha mudansa ne’ebé mak signifikante tebes,” Peter Roberts dehan.
Laboratóriu Nasionál iha knaar importante atu halo teste ba kazu COVID-19 ho lalais liu hodi prevene transmisaun moras coronavirus iha Timor-Leste.
“Ita hatene katak papel importante laboratóriu nian liuhusi servisu diagnóstiku ne’ebé mak loos ba médiku sira atu nune’e halo tratamentu ba pasiente sira ho efetivu melloramentu husi Laboratóriu Nasionál ajuda mós dezenvolvimentu sira husi nasaun nian no ha’u agradese ba ekipa Ministériu Saúde no Laboratóriu Nasionál, Menzies, ekipa the Fleming Fund servisu maka’as hodi proteze ita hotu,” nia hateten.
Governu Austrália iha nafatin kompromisu atu apoiu Ministériu Saúde hodi implementa programa vasina COVID-19 ba populasaun.
Iha fatin hanesan Reprezentante Menzies Austrália, Ismael Barreto, hateten Servisu Laboratóriu Nasionál iha ona kapasidade hodi atende kazu COVID-19.
”Menzies nia apoiu ba Laboratóriu Nasionál foka liu ba iha komunikasaun entre vizilansia no mdiku sira abordazen ida ne’e signifika katak la’ós de’it atu konserta iha aumenta númeru teste ne’ebé Laboratóriu oferese maibé integra servisu ne’ebé Laboratóriu oferese ho kuidadu klíniku nune’e mellora tratamentu ba pasiente husi forñese rezultadu ne’ebé mak loos no iha tempu ne’ebé mak badak,’’ nia dehan.
Notísia Relevante :Projetu konstrusaun sala Laboratóriu Nasionál atinje 95 %
Jornalista : Felicidade Ximenes
Editór :Agapito dos Santos
