Komunikadu Imprensa MEJD.

DILI, 18 dezembru 2020 (TATOLI)—Estudante finalista husi eskola privada no públiku hamutuk 10 maka hetan valór aas durante ezame nasionál tinan letivu 2020.

Koordenadór Kurríkulu Nasionál husi Ministériu Edukasaun Juventude no Desportu (MEJD), Pedro Ribeiro Gonzalves, esplika husi ensinu báziku nian maka estudante Fátima Tacia Soares Vicente husi Eskola Sentru Aprendizajen no Formasaun Eskolár (CAFE-sigla portugés) Maliana maka hetan valór excelente 46.

Notísia Relevante:Estudante rihun 53-resin pasa EN, 1.647 reprovadu

Hosi ensinu sekundária jerál siénsia no teknolojia nian iha estudante na’in 10 mak aprovadu ho valór 46 maihusi Eskola Sekundária Jerál Santa Madalena de Canossa 1, Ensinu Sekundáriu Jerál  Paulo VI na’in 2, Ensinu Sekundária Jerál Santo Inácio de Loyola na’in 2, Ensinu Sekundáriu Jerál São João Bosco na’in 1, Externato de São Jose na’in 1, Ensinu Seskundária Jerál  São Pedro na’in 1, Ensinu Sekundáriu Jerál  Santo António Baucau na’in 1, Ensinu Sekundáriu Jerál Nicolão Lobato na’in 1.

“Nune’e mós husi Ensinu Sekundária Jeral Siénsia Sosiais nian, iha estudante na’in 1 ho naran Denivia T.G.N Perreira husi Ensinu Sekundáriu Jerál  Santo Inácio de Loyola sai estudante diakliu tanba aprovadu ho valor 52,” Pedro fó sai ofisialmente iha salaun enkontru MEJD Vila Verde, Sesta (18/12).

Hosi estudante na’in 12 ne’ebé di’ak liu iha tinan ida ne’e, Ministru Edukasaun Juventude no Desportu,Armindo Maia promete katak, sei fó sertifikadu apresiasaun atu bele motiva tan estudante sira seluk bele kompete  iha futuru.

“Ita laiha osan no ita mós sei la fó bolsu estudu ba sira, maibé ita sei fó de’it apresiasaun hanesan oferese sertifikadu, tanba sira iha duni preparasaun di’ak hodi hasoru ezame nasionál ne’e,” Ministru Armindo Maia hateten.

Entretantu, estudante finalista hamutuk 53.425 ho pursentu 97 maka aprovadu, no 1.647 ka pursentu 3 reprovadu hafoin partisipa ezame nasionál (EN) iha loron 16 to’o 18 fulan-novembru 2020.

Estudante ensinu báziku hamutuk 30.359, sira ne’ebé maka pasa 29.437 ho pursentu 96.96(%), reprovadu 922 ho pursentu 3.03(%), Ensinu Sekundáriu Jerál ho totál estudante finalista hamutuk 20.145, aprovadu 19.671 (97.65 %), reprovadu ema na’in 474 (2.35%).

Nune’e mós, ensinu tékniku vokasionál iha totál estudante finalista 4.568, aprovadu 4.317 ho pursentu (94.50) no reprovadu ka pursentu (5.50%).

Jornalista: Tomé Amado

Editór: Agapito dos Santos

1 KOMENTÁRIU

HAKEREK NO HATÁN

Please enter your comment!
Please enter your name here