Seremónia entrega embalajen hosi SEA ba MTKI iha edifísiu Mandarin, segunda (26/10). Imajen Tatoli/Florêncio Miranda Ximenes

DILI, 26 outubru 2020 (TATOLI)--Sekretaria Estadu Ambiente (SEA) entrega embalajen ho tipu saku produtu lokál (bote) hamutuk 500 no saku verde produtu lokál resiklajen hamutuk 500 ba Ministériu Turizmu, Komérsiu no Indústria (MTKI), hodi fasita distribuisaun produtu Cesta Bázika ne’ebé sei realiza iha dezembru 2020, nu’udar parte ida hosi polítika rekuperasaun ekonómika iha kurtu prazu.

Seremónia entrega simbolikamente ne’e hosi Sekretáriu Estadu Ambiente, Deométrio do Amaral de Carvalho ba Vise-Ministru Turizmu, Komérsiu no Indústria, Domingos Lopez Antunes, liuhosi asina nota entrega hosi parte rua.

“Ami tenta posível atu implementa programa Cesta Bázika tenke uza materiál lokál sira hanesan bote, kaixa resiklajen no pasta verde sira hodi aliña ba polítika zero plástiku iha Timor-Leste,”  Sekretáriu Estadu Deométrio inform hafoin asina nota iha edifísiu MTKI, Mandarin, segunda ne’e.

Notísia Relevante: MTKI fasilita voucher ba programa cesta bázika

Tuir Governante ne’e, daudaun ekipa hahú mobiliza munisípiu sira atubele prodúz bote no lafatik, nune’e bainhira fulan-novembru ramata bele hetan ona embalajen 50.000 hodi fasilita implementasaun programa

“Ita sei haree grupu joven sira ne’ebé halo kaixa resiklajen no sei tenta haree empreza sira ne’ebé daudaun ne’e prodúz pasta verde sira, ho esforsu sira seluk atu halo intervesaun ne’ebé aliñadu ho zero plástiku,” nia akresenta.

Iha fatin hanesan, Ministru Turizmu, Komérsiu no Industria, José Lucas do Carmo Silva, apresia no konsidera servisu SEA ne’ebé estraordináriu hodi halo kooperasaun di’ak ho MTKI no komunidade produtór bote no kaixa resiklajen sira atu fasilita implementasaun programa Cesta Bázika.

“Eventu ne’e la’ós negósiu, maibé intervesaun umanitária ne’ebé Governu kria atu benefisia komunidade sira no fasilita programa tuir polítika rekuperasaun ekonómika iha ambitu COVID-9,” Ministru subliña.

Nune’e, Ministru  José Lucas husu ba ekipa ne’ebé envove implementasaun programa Governu ne’e atu labele buka lukru maibé presiza hatudu uluk vontade hanesan servidór nasaun  no povu.

“Governu hakarak ajuda duni ita-nia populasaun iha situasaun susar nia laran liuhosi programa Cesta Bázika,” nia akresenta.

Programa cesta Bázika envolve liña ministeriál, ne’ebé kada ministériu hetan alokasaun orsamentu ho tarefa ne’ebé define ona.

SEA hetan alokasaun orsamentu hamutuk millaun $1-resin no simu responsabilidade mobiliza produtór embalajen atu prodúz saku verde ho modelu tolu hanesan produtu lokál (bote), produtu resiklajen (kaixa) no saku verde ka Biodegradável ne’ebé sei sosa hosi empreza lokál Sira.

Embalajen sei sosa iha munisípiu tomak, ne’ebé kada bote ho folin $1.50 no kaixa resiklajen ne’ebé sosa hosi grupu joven kreativu sira ho folin $1, atu tau produtu ne’ebé sei distribui ba komunidade.

Jornalista: Florêncio Miranda Ximenes

Editora: Julia Chatarina

 

HAKEREK NO HATÁN

Please enter your comment!
Please enter your name here