Ekipa SEA-ANLA sosialisasaun dekretu-lei númeru 37/2020 ba loja na’in sira iha área Elemloi, Delta kona-ba utilizasaun plástiku, kinta (29/10). Imajen Tatoli/António Gonçalves

DILI, 29 outubru 2020 (TATOLI)–Governu liuhosi Sekretaria Estadu Ambiente (SEA) no Ajénsia Nasionál Lisensiamentu Ambientál (ANLA) hahú sensibiliza dekretu-lei númeru 37/2020 kona-ba eliminasaun importasaun no produsaun saku, embalajen, no objetu ho matéria plástiku  iha loja sira iha área Elemloi Aimutin, hudi-laran to’o Bairro Pité, munisípiu Dili.

Lejizlasaun ne’e rasik promulga ona  hosi Prezidente Republika, tanba ne’e autoridade kompotente fó tempu ba loja sira atu hapara utiliza matéria plástiku.

“Ita fó tempu fulan-tolu hosi agora, hahú 23 janeiru 2021 ba oin la tolera ona loja sira utiliza plástiku,” Sekretáriu Ezekutivu ANLA,  António Lelo Tasi, informa hafoin divulga diploma ba loja sira iha Aimutin, kinta ne’e.

Nia dehan, SEA iha responsabilidade divulga informasaun ba loja iha territóriu laran ne’ebé utiliza plástiku liga ba polítika zero plástiku.

Tanba ne’e liuhosi sirkulasaun, fó tempu ba loja na’in sira atubele utiliza daudaun plástiku ne’ebé iha sira-nia liman maibé  labele importa ona.

Lejizlasaun foun ne’e, kompleta ho artigu balun ne’ebé ligadu ho ninia sansaun  ne’ebé autoridade ambiente maka sei hola resposabilidade hanesan sansaun administrasaun inklui suspende atividade.

Governu kontinua tama sai loja sira no fó tempu atu hamamuk armajen ne’ebé iha plástiku, hafoin iha janeiru 2021 bainhira loja sira kontinua uza sei iha intervensaun hahú hosi loja to’o merkadu tradisionál.

SEA hasai diretiva operasionalizasaun ho pontu importante sira mak, dahuluk hahú loron emisaun diretiva, ba entidade sira hotu ne’ebé halo negósiu produtu ruma, fó tempu loron 120 hodi prepara mekanizmu substituisaun ho saku degradável no biodegradável ka saku verde sira hanesan bote ka kohe ne’ebé prodúz iha Timor-Leste.

Daruak, hahú 2021 loja sira ne’ebé fa’an  ‘nasi bungkus’ hosi, kanudu plástiku, kopu masa no seluk tan ne’ebé utiliza matéria plástiku sei labele importa, fa’an ka distribui no bandu atu prodúz iha Timor Leste.

Datoluk, iha tinan oin, entidade importadór, distributór no loja sira ne’ebé fa’an bee iha matéria plástiku ho medida mili litru 600 mai kraik sei bandu hotu no bandu prodúz bee ho medida hanesan to’o medida kiik iha Timor-Leste.

Dahaat, Autoridade Ambiente sei halo fiskalizasaun no sei foti medida hodi halo apreensaun ba sasán ne’ebé mensiona ona iha prazu ne’ebé determina.

Ikus liu, bainhira halo fiskalizasaun, maka identifika kompañia, supermerkadu, loja, grupu ka pesoál balun ne’ebé halo infrasaun ba dekretu-lei númeru 37/2020, Autoridade Ambiente sei fó sansaun bazeia ba artigu 41 no 42.

Diseminasaun informasaun ne’e, partisipa Sekretáriu Estadu Ambiente, Deométrio do Amaral de Carvalho, membru Polísia Nasional Timor-Leste inklui funsionáriu SEA no ANLA.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here