Logotipu Conselho de Imprensa (CI). Imajen/Espesiál.

DILI, 18 dezembru 2020 (TATOLI)—Parlamentu Nasionál (PN) kontinua adia eleisaun ba membru Cconselho de Imprensa ba fulan-janeiru tinan 2021.

Notísia Relevante: Petisaun Jornalista na’in-31 halo PN adia eleisaun ba membru Conselho de Imprensa

“Ohin konferénsia líder bankada parlamentár sira deside adia eleisaun ba membru Conselho de Imprensa ba janeiru 2021,” Vise Sekretariu Meza Parlamentu Nasionál, Deputadu António Nobre Tilman, informa liuhosi konferénsia imprensa, iha Parlamentu Nasionál, sesta ne’e.

Nia dehan, iha reuniaun ka konferénsia líder bankada parlamentár ne’e diskute kona-ba asuntu refere maibé to’o ikus deside adia.

“Razaun tanba iha fulan-dezembru nia laran ita hasoru loron boot natal no tinan foun entaun iha fulan ida-ne’e nia laran ita la konsege marka eleisaun,” nia dehan.

Entretantu Bankada parlamentár Congresso Nacional da Reconstrução de Timor (CNRT) propoin Expedito Loro Dias Ximenes, Bankada Frente Revolusionária Timor-Leste Independente (FRETILIN) kontinua propoin Paulo Adriano da Cruz “Hunu Mali” (rejigna-aan hosi kandidatura), Bankada Partido Libertação Popular (PLP) propoin Jordão Antero Henrique Marques no Bankada UDT/FM propoin Deonaia da Silva Prego.

Lei Komunikasaun Sosiál artigu 45 kona-ba Kompozisaun Konsellu Imprensa alínea c, hateten sidadaun na’in-rua ne’ebé ho kapasidade be ema hotu hatene no iha méritu profisionál ho preferénsia ne’ebé hatutan ba komunikasaun sosiál, hosi sira na’in-rua ida nu’udar jurista, ne’ebé Parlamentu Nasionál hili.

Bazea ba lei Komuniasaun Sosiál nú 5 /2014, 19 novembru, Kapítulu VII estabelse Conselho de Imprensa, artigu 42 (Natureza no Independénsia), alínea 1, hateten Konsellu Imprensa nu’udar entidade administrativu independente no hala’o ninia atribuisaun nomós kompeténsia la haktuir diretrís ka orientasaun sira podér polítiku nian.

Nune’e mós artigu 45 hosi Lei Komunikasaun kona-ba Kompozisaun Konsellu Imprensa hamutuk membru na’in-lima, ne’ebé atu hili liuhosi dalan tuir-mai:

a). Reprezentante jornalista na’in-rua ne’ebé sira hili tiha ona liuhosi eleisaun (hili ona);
b). Reprezentante órgaun komunikasaun sosiál ida, ne’ebé órgaun sira hili tiha ona liuhosi eleisaun (hili ona);
c). Sidadaun na’in-rua ne’ebé ho kapasidade be ema hotu hatene no iha méritu profisionál ho preferénsia ne’ebé hatutan ba komunikasaun sosiál, hosi sira na’in-rua ida nu’udar jurista, ne’ebé Parlamentu Nasionál hili (seidauk).
d). Membru sira Konsellu Imprensa hili entre sira ninia Prezidente.

Artigu 47 hosi Lei Komunikasaun Sosiál (Estatutu membru sira-nian) alínea 1 hateten bainhira membru Konsellu Imprensa hala’o knaar sei tau-hamutuk ho ezersísiu atividade profisionál ne’ebé hanesan, sei la selu nein fó subsídiu osan no la iha karatér permanente.

Alínea 2 hosi artigu ne’e fundamenta, membru sira Konsellu Imprensa iha direitu ba seña prezensa tuir termu ne’ebé ninia estatutu sei estabelese karik.

Tuir Rejimentu Parlamentu Nasionál (RPN) artigu 69 (Votatasaun nia forma) alínea 1 hateten votasaun nia forma sira hanessan tuir mai ne’e:
a. Votasaun ordinária;
b. Votasaun nominal;
c. Votasaun liuhosi ekkrutíniu sekretu.
d. La permite votasaun ho aklamasaun.

Ho eleisaun ba Membru Konsellu Imprensa uza RPN artigu 72 (Votasaun liuhosi eskrutíniu sekretu) katak, votasaun liuhosi eskrutíniu sekretu só bele uza iha eleisaun ka iha deliberaasaun ne’ebé, konforme Rejimentu ka Estatutu Deputadu sira-nian, tenke halo tuir forma ne’e, ka wainhira plenáriu delibera, tuir rekerimentu hosi Deputadu na’in-10.

Purtantu RPN Artigu 73 (Empate iha votasaun) alínea1 hateten, karik votasaun fó rezultado empate, matéria ne’ebé sai nu’udar objetu ba votasaun sei diskute tan molok tau hikas ba votasaun foun.

Alínea 2 hosi artigu 73 ne’e esplika, empate iha votasaun daruak sei konsidera katak la aprova.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here