DILI, 18 dezembru 2020 (TATOLI) – AD. SLB Laulara hakat ona ba finál Tasa Rosa “Muki” Bonaparte hafoin halakon S’Amuser FC 4-0 liuhosi kontinuasaun jogu, ohin, tuku 07:00 Otl, iha Estádiu Munisipál Dili.
Notísia Relevante : Udan “interrompe” jogu Tasa Rosa “Muki”, AD. SLB Laulara vs S’Amuser
Iha jogu primeira parte entre AD.SLB Laulara vs S’Amuser iha Estádiu Munisipál Dili, horiseik loraik, AD. SLB Laulara prodús golu rua (2) ona no S’Amuser hela ho zero (0). Ironia, jogu tenke hapara molok tama ba jogu segunda parte nian tanba udan-boot halo bee-nalihun iha kampu-laran.
Bainhira iha jogu segunda parte nian hala’o iha ohin dadeer, tuku 07:00 to’o 07:40 Otl, ekipa rua lansa kontra atake ba malu, maibé jogadora AD. SLB iha oportunidade barak liu hadau bola hosi jogadora S’Amuser sira. Ho nune’e, iha minute 50, Elvira Ana da Silva (22) hosi AD. SLB Laulara halo golu ida hodi lori score ba 3-0.
Hakur fali ba iha minutu 75, Elvira Ana da Silva nafatin lansa golu ida hodi hatuur rezultadu 4-0 konta ho golu primeira parte horiseik nian. Nune’e, AD. SLB Laulara sei hasoru FC Buibere iha finál Tasa Rosa “Muki” Bonaparte, domingu (20/12), iha Estádiu Munisipál Dili.
Jornalista : Hortencio Sanchez
Editór : Francisco Simões
