Estádiu Munisipál Dili. Imajen/Dok.LFA

DILI, 17 dezembru 2020 (TATOLI)—Udan-boot iha minutu balun nian laran iha Dili, ohin loraik, lori “dezastre” ba lala’ok jogu futeból feminina Tasa Rosa “Muki” Bonaparte.

Notísia Relevante : Tasa Rosa “Muki”, Maranatha “derrota” hasoru Buibere 1-2

Jogu ne’ebé hala’o iha Estádiu Munisipál Dili entre AD. SLB Laulara kontra S’Amuser FC, tenke joga de’it iha primeira parte no labele kontinua ba segunda parte tanba udan-boot “interrompe” tiha jogu ne’e ho bee-nalihun nakonu iha kampu-laran.

Estádiu Munisipál Dili. Imajen/Dok.LFA

Supervizór ba jogu Tasa Rosa “Muki” Bonaprte hosi Federasaun Futeból Timor-Leste (FFTL) ho árbitru sira deside  hapara jogu bainhira AD. SLB Laulara nia score 2-0 ba S’Amuser FC.

Golu rua ne’ebé kontribui valor pozitivu ba AD. SLB Laulara prodús hosi jogadora Elvina da Costa (10) iha minutu 32” ho Elvira Ana da Silva (22) iha minutu 40+1.

Udan-boot no halo bee-nalihun iha kampu-laran la fó espasu di’ak no seguru ba ekipa rua atu kontinua sira-nia jogu, tanba ne’e jogu entre parte rua tenke adia fali ba sesta dadeer (18/12), tuku 07:00 Otl.

“Iha nasaun seluk, bainhira atu joga torneiu, tasa ka kopa futeból ruma, ema nunka preokupa ho tempu udan ka rai-manas ka tempu estrimu saida de’it. Tanba sira-nia kondisoens kampu no fasilidade Estádiu nian sofistikadu. Maibé iha Timor, Governu gasta osan tokon ba tokon dolar amerikanu halo konstrusaun no reabilitasaun ba Estádiu sira, la konsege halo “májiku” estádiu ida ho kualidade no sofistikadu. Susar ne’e iha ne’e,” hateten adeptu ida hosi AD. SLB Laulara hodi espresa ninia sentimentu ladún kontenti bainhira haree jogu entre nia ekipa favoritu ho S’Amuser tenke adia tanba de’it udan.

Kondisaun Estádiu Munisipál Dili, Estádiu Kafé Gleno-Ermera, Estádiu Manatuto no Estádiu Baucau,  bele dehan, ladún seguru atu realiza jogu iha tempu udan.  Tanba ne’e jogu futeból sira ne’ebé hala’o iha Timor-Leste, tempu sai fatór importante. Tanba bainhira tempu udan, maka kampu-laran sai tiha “debu boot” ka bee-nalihun. Nune’e, difisil tebes atu jogadór sira joga iha kampu-laran.

Jornalista   : Hortencio Sanches

Editór         : Francisco Simões

HAKEREK NO HATÁN

Please enter your comment!
Please enter your name here