DILI, 17 dezembru 2020 (TATOLI)- Diretora Ezekutiva Unidade Informasaun Finanseira (UIF) hosi Banku Sentrál Timor-Leste (BCTL), Maria de Jesus Sarmento, hateten, ohin loron, aktu brankeamentu kapitál no finansiamentu terrorizmu sai ameasa transnasionál iha nasaun sira iha mundu.
Notísia Relevante : MJ ho BCTL asina MoU ba kombate krime brankamentu kapitál
“Aktu brankamentu kapitál no finansiamentu terrorizmu sai ameasa transnasionál ne’ebé boot loron ba loron no koloka nasaun sira iha risku rua hanesan laiha estabilidade finanseira no risku ba reputasaun,” Diretora Ezekutiva UIF-BCTL, Maria de Jesus Sarmento, hateten iha nia diskursu iha serimónia asina protokolu kooperasaun entre UIF-BCTL ho Ministériu Justisa liuhosi Diresaun Jerál Servisu Rejistu Notariadu (DGSRN) kona-ba brankeamentu kapitál, ohin, iha salaun auditoria Ministériu Justisa, Caicoli, Dili.
Nia afirma, tanba ne’e atu kumpre padraun internasionál iha matéria prevensaun no kombate iha risku rua ne’e Timor-Leste adere ona ba grupu Ázia pasífiku ne’ebé hala’o nia kna’ar iha matéria prevensaun no kombate brankeamentu kapitál no finansiamentu terrorizmu.
Maria de Jesus, informa grupu Ázia pasífiku nu’udar organizmu rejionál ida ba grupu asaun finanseiru ne’ebé estabelese no define ba pratika di’ak internasionál ba rekomendasaun 40 hodi bele implementa.
“Atu nasaun membru hotu-hotu bele kumpre no implementa iha nasaun ida-idak tuir rekizitu no sirkunstánsia karaterístika nasaun nian,” Maria de Jesus Sarmento hateten.
Diretora UIF, Maria de Jesus Sarmento, dehan dadaun ne’e sira-nia parte estabelese ona akordu neen (6) iha nivel nasionál hanesan ho Prokuradoria Jerál Repúblika (PGR), Polísia Sientífika Investigasaun Kriminál (PCIC), Komisaun Funsaun Públika (CFP), Servisu Rejistrasaun no Verifikasaun Emprezariál (SERVE), Ministériu Justisa no tempu badak sei estabelese mós akordu ho instituisaun seluk.
Intensaun hosi kooperasaun ne’e fó apoiu ba malu atu nune’e UIF enrikesa prosesu analiza iha informasaun finanseira liga ba prátika internasionál sira ba kombate krime brankeamentu kapitál no finansiamentu terrorizmu.
Nia hatutan, UIF Timor-Leste mós formaliza ona kooperasaun ho Unidade Informasaun Finanseira nível internasionál hamutuk 16 ho nia alvu mak permite troka informasaun no mós liuliu informasaun ne’ebé iha rezultadu analiza finanseira atu fasilita parte autoridade prosesu investigasaun tantu iha rai-laran no rai-li’ur.
Maria de Jesus, hateten Timor-Leste mós hakarak kumpre padraun internasionál sira hodi adere ba rede internasionál ne’ebé koñesidu hanesan grupu Unidade Informasaun Finanseira Edmond nu’udar grupu halibur membru hotu iha mundu tomak.
Tuir Lei númeru 17/2011 estabelese rekizitu jerál kona-ba prevensaun no kombate krime brankeamentu kapitál no finansiamentu terrorizmu hanesan forma ida hodi kumpre padraun internasionál sira.
Kna’ar UIF simu relatóriu tranzitória suspeita hosi instituisaun finanseira hodi halo analiza hafoin komunika rezultadu ba autoridade kompetente liu-liu Ministériu Públiku (MP) hodi fasilita liután investigasaun tuirmai.
Maria de Jesus, informa kona-ba finansiamentu terrorizmu mezmu dadus ne’ebé hatudu kona-ba prátika iha Timor-Leste tuir analiza risku la hatudu maka’as, maibé Estadu fó atensaun maka’as atubele halo prevensaun nafatin.
Jornalista : Nelson de Sousa
Editór : Francisco Simões
