Diretór Jerál Servisu Rejistu Notariadu, Crisogno da Costa Neto ho Diretóra Ezekutivu Unidade Informasaun Finanseira (BCTL), Maria José de Jesus Sarmento, asina MoU ba kombate brankeamentu kapitál. Imajen Tatoli/Egas Cristovão

DILI, 17 dezembru  2020 (TATOLI)-Ministériu Justisa (MJ)  liuhosi Diresaun Jerál Servisu Notariadu (DGSRN), ohin, asina nota entendimentu (MoU) ho Unidade Informasaun Finanseira (UIF) hosi Banku Sentrál Timor-Leste (BCTL)  kona-ba brankamentu kapitál.

MJ no BCTL asina MoU ba kombate brankeamentu kapitál. Imajen Tatoli/Egas Cristovão

Protokolu kooperasaun ne’e asina direita hosi Diretór Jerál Rejistu Notariadu, Crisogno da Costa Neto no  Diretora Ezekutiva Unidade Informasaun Finanseira BCTL, Maria de Jesus Sarmento,  iha salaun auditóriu Ministériu Justisa, Caicoli, Dili.

Crisogno da Costa Neto, hateten, kooperasaun ida ne’e nu’udar aktu kooperasaun entre instituisaun rua ba prevensaun krime brankamentu kapitál.

“Ho akordu ne’e bainhira Unidade Informasaun Finanseira BCTL deteta aktu krime ruma kona-ba brankamentu kapitál  presiza informasaun ruma servisu notariadu bele fornese informasaun dadus, tanba ne’e antes instituisaun rua ne’e atu halo servisu sira ho baze kooperasaun,” diretór Jerál Rejistu Notariadu, Crisogno da Costa Neto.

Diretora UIF, Maria de Jesus Sarmento,   lori BCTL  nia naran agradese ba MJ  hodi bele  formaliza protokolu kooperasaun formal  iha  matéria  prevensaun  no kombate brankamentu kapitál no finansiamentu terrorizmu iha Timor-Leste.

Protokolu ida ne’e atu permite troka informasaun apoiu malu liu-liu UIF ho Diresaun  Jerál Servisu Notariadu bainhira eziste suspeita ruma iha prátika krime brankamentu kapitál no finansiamentu terrorizmu no krime sub-zajente ne’ebé ho orijen brankamentu kapitál no finansiamentu terrorizmu.

Ho akordu kooperasaun ne’e, Maria de Jesus,  esplika, sei kontribui ba  transparénsia boot liuhosi troka informasaun kona-ba rejistu pesoa singular, koletiva no organizasaun sira iha Timor-Leste, ne’ebé ema kriminozu sira utiliza hodi  prátika aktu ilísitu  brankamentu kapitál ho finansiamentu terrorizmu

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here