Reklamante sira hosi Suku Comoro, segunda nee hasoru malu ho Komisaun F iha Parlamentu Nasionál . Imajen TATOLI/Evaristo Soares Martins.

DILI, 14 dezembru 2020 (TATOLI)—Reklamante hosi Suku Comoro, Postu Administrativu Comoro, Postu Administrativu Don Aleixo, Munisípiu Dili, hamutuk na’in-1400 hosi aldeia haat (4) ne’ebe seidauk simu subsídiu $200, ohin, hato’o keixa ba Parlamentu Nasionál. 

Notisia Relevante: Governu husu xefe suku sira tenke aselera pagamentu ba reklamante sira

“Ami ezije tanba maluk balun hetan no balun la hetan. Entaun ne’e Governu halo diskriminasaun ba nia povu rasik. Tan ne’e mak ohin ami hasoru diretamente reprezentante povu iha uma fukun Parlamentu Nasionál atubele buka solusaun ba ami reklamante sira-ne’e nia problema,” Reprezentante Reklamante sira, Simão Ximenes, informa ba jornalista sira iha Parlamentu Nasionál.

Reprezentante reklamante ne’e fó-sai katak, sei kontinua hein desizaun Governu nian hahú hosi aban (tersa) to’o sesta semana ne’e no hein katak iha tempu badak Governu bele halo pagamentu.

“Espera Governu bele halo pagamentu. Se tersa to’o sesta agora mak sira seidauk halo pagamentu, ami sei mai nafatin hato’o ba deputadu sira. Tanba, ne’e ami nia direitu tomak,” Simão hateten.

Simão fiar katak reprezentante povu iha uma fukun Parlamentu Nasionál ne’e sei komunika ho Governu hodi bele buka solusaun ba problema ne’e.

Nia haktuir, Xefe Suku Comoro informa ba reklamante ne’ebé mak seidauk hetan $200 ne’e, sei laiha direitu atu hetan Cesta Bázika maibé ohin Komisaun F dehan tenke hetan hotu.

Sekretária Komisaun F ne’ebé trata asuntu saúde, seguransa sosiál no Igualdade jéneru, deputada Helena Martins Belo hateten, reklamante sira hato’o preokupasaun ne’e pertinente no Governu tenke fó solusaun.

“Loron 15 ne’ebé Governu promete ona ba sira liu tan tiha ona. Agora tama ona fulan neen (6). Ohin, ha’u telefone ba Diretór Jerál MSSI iha sinál pozitivu katak semana ida-ne’e sira sei halo pagamentu. Tanba ne’e, ami sei hein komesa hosi tersa to’o sesta, espera sira bele halo ona pagamentu. Se tersa to’o sesta mak sira la halo pagamentu, entaun reklamante sira sei nafatin mai hato’o keixa iha Parlamentu Nasionál ne’e,” Deputada Helena Martins Belo ne’ebé atende reklamante sira ne’e hateten.

Sekretária Komisaun F ne’e fó-sai katak, bainhira MSSI la fó solusaun mak Parlamentu sei bolu Governu ka se lae Parlamentu mak tún diretamente ba terrenu.

Entretantu, Xefe Suku Comoro, Eurico Guterres informa ba Agência TATOLI katak totál reklamante iha suku Comoro la’ós ema na’in-1400 maibé hamutuk ema na’in-1222.

“La’ós 1400 maibé reklamante Suku Comoro ne’ebé mak seidauk simu subsídiu ne’e hmutuk na’in-1222 de’it. Agora daudaun reklamante sira-nia naran iha ona Ministériu Administrasaun Estatál, seidauk to’o  iha Ministériu Solidariedade Sosiál no Inkluzaun. Governu informa mai ami katak iha fulan-dezembru nia laran sei halo pagamentu,” xefe suku Comoro ne’e esplika.

Xefe suku ne’e subliña, reklamante sira-nia naran iha hotu maibé Ministériu Administrasaun Estatal (MAE) sei halo verifikasaun hafoin enkamiña ba iha MSSI.

“Kuandu tama ona MSSI la kle’ur taka ona iha sede suku, nune’e reklamante bele mai haree sira-nia naran no marka tempu selu sira-nia osan,” nia dehan.

Xefe Suku Comoro konsidera keixa ne’ebé reklamante sira hato’o Parlamentu Nasionál ne’e hanesan direitu tanba dala barak ema dehan xefe suku sira mak bosok.

“Ha’u hateten tiha ba reklamante sira katak imi ba kesar iha Parlamentu ne’e livre no avontade tanba direitu imi-nian, maibé demora ne’e hosi leten,” nia dehan. 

Jornalista: Evaristo Soares Martins

Editór: Cancio Ximenes

 

HAKEREK NO HATÁN

Please enter your comment!
Please enter your name here