Ministra Saúde, Odete Maria Freitas Belo Hasai Foto hamutuk Lansa Projetu Sistema mSupply. Palacio Das Cinzas, Caicoli. Tersa (15/12). Imajen Tatoli/Egas Cristovão

DILI, 15 dezembru 2020 (TATOLI)—Servisu Autónomu Medikamentu no Ekipamentu Saúde (SAMES) sei uza sistema mSupply hodi halo jestaun ba medikamentu ne’ebé tama no sai iha armazén SAMES.

Ministra Saúde (MS), Odete Maria Freitas Belo, konsidera sistema ne’e nu’udár meiu ida lais liu atu apoia SAMES hodi bele hala’o ninia sistema aprovizionamentu bainhira hakarak sosa tan ai-moruk.

Notísia Relevante :SAMES hahú identifika ai-moruk liu prazu

Loloos ne’e SAMES utiliza ona sistema mSupply iha tinan 2010 to’o 2012, liuhosi apoiu parseiru dezenvolvimentu sira hanesan Uniaun Europeia (UE), Austrália no Banku Mundiál atu fó apoiu ba jestaun ai-moruk.

“Momentu ne’ebá SAMES rasik mak utiliza sistema ne’e, maski barak mak seidauk familiár, maibé ho esforsu tomak, sistema foin utiliza ho didi’ak iha 2014. Iha 2016 to’o 2017 governu esforsu espande liután sistema ne’e ba to’o iha sentru saúde, postu saúde no ospitál referál sira,” Ministra Sáude Odete hateten ba jornalista sira iha serimónia lansamentu sistema mSupply ne’ebé hala’o iha Palácio das Sinzas, Caicoli, tersa ne’e.

Governante ne’e hatutan, bainhira sistema ne’e espande to’o iha sentru saúde sira, postu saúde no ospitál referál sira, Governu anteriór rasik hamosu fali sistema ida ho naran Adenbox, tanba konsidera sistema mSupply mai hosi estranjeiru.

“Depois sistema Adenbox ne’e kria tiha, maibé seidauk preparadu didi’ak, entaun ho desizaun tuir mai Governu hapara provizóriu hodi fó tempu atu hadi’a fali. Tanba ne’e, oras ne’e daudaun SAMES uza hela sistema mSupply ne’ebé familiár ona atu halo jestaun di’ak ba ai-moruk,” nia hateten.

Notísia Relevante :SAMES hahú identifika ai-moruk liu prazu

Jornalista: Tome Amado

Editór: Agapito dos Santos

HAKEREK NO HATÁN

Please enter your comment!
Please enter your name here