Ofisiail Funsionariu husi Ministeriu Solidaderidade kontinua halao pagamentu subsidiu $200 ba komunidade sira iha Sede Suku Bairo Pite,. Imajen/Antonio Goncalves

DILI,  28 novembru 2020 (TATOLI)—Governu  liuhosi Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, husu ba Autoridade Komunitária sira tenke iha responsablidade ba subsidiu $200 ba reklamante sira, tanba osan ba pagamentu reklamante sira tama ona iha konta bankaria suku nian no tenke aselera pagamentu ne’e.

“Ha’u husu ba xefe suku sira atu iha responsabilidade ba pagamentu reklamante sira hamutuk 2.881 ne’e, tanba osan tama ona ba konta bankária suku nian. Nune’e, ha’u husu para tenke aselera ona pagamentu ne’e,” Diretór Jerál MSSI, Rui Manuel Gago Exposto, dehan ba Agcência TATOLI iha nia knaar fatin Caicoli, Dili, sesta ne’e.

Nia hateten, pagamentu ba reklamante sira-ne’e MSSI fó durasaun tempu to’o loron neen (6) de’it no bainhira liu loron ne’ebé determina mak  reklamante sira-nia osan sei depozita fila-fali ba fundu COVID-19 no reklamante sira sei lakon sira-nia diréitu ba subsidiu $200.

“Husu nafatin ba Autoridade Komunitária sira, atu labele halo pagamentu tuir ita-boot sira-nia hakarak. Tanba loron ne’ebé halo pagamentu ba reklamante sira to’o loron neen de’it. Xefe suku sira tenke iha responsablidade tomak ba reklamante sira,” nia dehan. 

Nia dehan, iha dezembru tinan ne’e sei taka ona pagamentu, tanba ne’e mak Autoridade Komunitária labele halimar ho pagamentu ba reklamante sira. 

Nia informa, iha Dili hela suku rua mak seidauk halo pagamentu mak suku Comoro no Suku Fatuhada, Postu Adminsitrativu Dom Aleixo nian.

Diretór Jerál MSSI hetan informasaun husi suku rua ne’e katak suku rua ne’e sei halo pagamentu ba reklamante sira iha segunda (30 novembru) semana oin mai. 

Tanba ne’e, nia husu ba Ministériu Administrasaun Estatál (MAE) atu fo orientasaun ba xefe suku sira hodi aselera pagamentu tanba loron limitadu hela.

Entretantu, Xefe Suku Comoro, Eurico de Jesus da Costa, hateten segunda semana oin, Suku Comoro sei realiza pagamentu entaun nia husu ba Polísia Nasionál Timor Lorosa’e atu akompañia prosesu ne’e tanba iha populasaun balu halo protesta.

“Tuir loloos, ami halo pagamentu ona maibé populasun hamutuk ho xefe aldeia balun halo protesta. Tanba ne’e mak sei hala’o pagamentu ne’e iha segunda semana oin mai. Sira protesta tanba dehan sira-nia naran la tama iha lista reklamante,” xefe suku ne’e hateten. 

Nia dehan, segunda semana oin tenke hala’o ona pagamentu tanba ema-nia direitu, ema ida labele halakon ema ida nia direitu.

Nia informa, Lista reklamante ba Suku Comoro nian hamutuk ema na’in-86 ho montae osan hamutuk $17.200.

Notisia Relevante: Ohin, Governu halo ona pagamentu ba reklamante sira

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here