Lalenok United FC sai kampiaun iha Jogu Finál Tasa 12 Novembru 2020. Imajen Tatoli/Antánio Gonçalves

DILI, 12 dezembru 2020 (TATOLI)—Ekipa “Boek Luro-Mata”, Lalenok United FC, prova ba nia adeptu no Timor-oan hotu katak sira merese duni hela ho títulu “ekipa jigante” iha istória jornada futeból Timor-Leste nian.

Notísia Relevante : Lalenok hakarak foti tan tasa 12 Novembru

Mezmu manan nia adversáriu “Makikit Laulara”, AD. SLB liuhosi ezekusaun penalidade 4-1 (sura golu jogu normál ho penalidade nian hamutuk 5-2), ekipa ne’ebé lidera hosi treinadór  Simón Elissetche, prova duni ba bola-mania sira iha Timor-Leste no Timor-oan sira namkari iha diaspora katak, Lalenok United FC la’ós klube ne’ebé  “levemente” ka “enteng”.

Prezidente Komite 12 Novembru,Gregorio Saldanha entre Tasa 12 Novembru ba Treinador Lalenok United FC iha Estádiu Munisipál Dili,sábadu (12/12). Imajen Tatoli/António Gonçalves

Simón Elissetche ho nia alunu sira iha Lalenok United FC realiza duni sira-nia kompromisu ba sira-nia adeptu no Timor-oan hotu katak, sira hakarak no merese duni foti tan tasa 12 Novembru, epoka ne’e.

Komandante Polísia Pedro Belo ho nia espoza Zenilda Gusmão, hanesan na’in ba klube Lalenok United FC  “merese” duni selebra festa boot ho kontente no “glória” hamutuk ho nia jogadór sira ne’ebé kontribui prestasaun “brillante” ba naran boot no naran di’ak Lalenok United FC nian hanesan “klube jigante” iha Timor-Leste.

Prestasaun hanesan kampiaun dala-tolu tuituir malu iha tinan-rua nia laran; Tasa 12 Novembru 2019, Kopa  Federasaun Futeból Timor-Leste (FFTL) 2020 no Tasa 12 Novembru 2020, Lalenok United FC marka istória “osan-mean” iha kampu futeból Timor-Leste nian.

Vitória Lalenok United FC nian iha jogu finál Tasa 12 Novembru, ohin, iha Estádiu Munisipál Dili, ho score 4-1 tenke liuhosi ezekusaun penalidade tanba iha jogu primeira parte to’o segunda parte (tempu normal), ekipa-rua  ne’e fahe golu hanesan 1-1, tanba ne’e, bainhira sura golu jogu normál nian hamutuk ho golu drama penalidade, maka Lalenok United FC manan kompletamente AD.SLB Laulara ho score  5-2.

Jogadór Lalenok United FC kamizola mean kinur hadau-malu bola bainhira joga ho AD. SLB Laulara iha Finál Tasa 12 Novembru 2020 iha Estádiu Munisipál Dili, sábadu (12/12/) Imajen Tatoli/António Gonçalves

Jogu normál iha minutu 6”, jogadór Lalenok United FC,  Elias Mesquita (10), kontribui uluk golu ba nia ekipa hodi lees rede AD.SLB nian ne’ebé asegura hosi Filonto Nogueira (31).

Jogu sai manas liután no ekipa “Makikit Laulara”, AD.SLB lakohi lakon oportunidade, tanba ne’e, liuhosi sira-nia coach ka treinadór, Kim Hwan deside muda  kedas sira-nia ritmu jogu hosi defensór ba atake.

Esforsu no mudansa ne’e, lori “rahun” di’ak ba AD.SLB hodi halo joga mea-kampu iha Lalenok United FC nia “defeza”-laran.  Nune’e, hakat ba minutu 52” estrela jogadór AD.SLB, João Pedro Freitas (7), aproveita pasajen ida hosi nia kolega kontribui kedas golu ba guarda rede Lalenok United FC, Fagio Pereira (40) hodi hatuur ekipa rua nia score  1-1.

Ezekusaun penalidade  

Jogador no guardarede SLB Laulara FC haree hela golu ne’ebé marka hosi jogadór Lalenok Unted FC iha Finál Tasa 12 Novembru 2020 iha Estádiu Munisipál Dili, sábadu (12/12). Imajen Tatoli/Antánio Gonçalves

Iha ezekusaun penalidade nian, ekipa Lalenok United FC deside substitui nia guarda rede Fagio Pereira ba fali Nataniel Agbozo iha minutu 89”.

Estratéjia no konfiansa ne’ebé treinadór Lalenok United FC, Simón Elissetche, “tula” ba guarda rede Nataniel Agbozo, ezekuta ho di’ak tebes. Nune’e, Nataniel Agbozo konsege salva bola-rua suta penalidade nian hosi jogadór  AD. SLB Laulara, Filipe Oliveira (4) ho Bakayoka Ozi (13) hodi fó “glória” ba Lalenok United FC 4 no “Makikit Laulara” hela ho golu ida (1) (4-1).

Drama penalidade ne’ebé kontribui golu ida ba AD. SLB Laulara prodús hosi Nidio Alves (93) no golu ba vitória Lalenok United FC nian iha ezekusaun penalidade ne’e  kontribui  hosi Fabio Cristian (93), Julião Mendonça (17), Yohanes Gusmão (12) ho Paulo Galy (21).

Xanana Gusmão asiste

Líder Nasionál, Kayrala Xanana Gusmão, hatudu hela ninia teste médiku hafoin kumpre auto kuarentena loron 14 iha rezidénsia Balibar, sábadu (12/12). Imajen TATOLI/Eugénio Pereira

Jogu entre ekipa Lalenok United FC vs AD. SLB Laulara, hetan onra boot tanba asiste direita hosi lider karizmátiku no Komandante ein-Xefe FALINTIL, Kay Rala Xanana Gusmão.

Mezmu foin termina nia kumprimentu auto-kuarentena durante loron-14 tuir orden saúde públiku nian kona-ba prevensaun COVID-19,  Xanana Gusmão, hanesan fundadór prinsipál klube AD. SLB Laulara nian, marka tempu hodi asiste jogu ne’e to’o termina.

Xanana Gusmão, hatais faru riskadu (metan-mutin) no kalsa jeans tuur iha tribune VIP (very important person)  iha kedas prezidente Liga Futeból Timor-Leste (LFTL), Nilton Gusmão nia sorin hodi asiste ekipa rua joga iha kampu-laran.

Iha loron 18 novembru 2020, eis Prezidente Repúblika Kay Rala Xanana Gusmão, halo viajen ba Indonézia ho aviaun Zet privadu (charter/alugér hosi Indonézia) hodi hala’o “check up” saúde iha ospitál militár Gatot Soebroto (RSPAD, sigla indonézia) iha Jakarta.

Hafoin semana ida iha Jakarta submete ba “check up” saúde nia rezultadu hatudu katak, Komandante Ein-Xefe FALINTIL ne’e nia saúde di’ak tebes no fila mai rai doben Timor-Leste iha loron 28 novembru, loron istóriku proklamasaun independénsia Timor-Leste nian.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here