Vise-Ministru Obra Públika, Nicolau Lino Freitas Belo. Imajen Tatoli/Egas Cristovão

DILI, 11 dezembru 2020 (TATOLI)-  Governu liuhosi Ministériu Obra Públika (MOP) sei mellora sistema drenajen iha kapitál Dili iha 2021 hodi prevene inundasaun ne’ebé afeta ba komunidade.

Notísia Relevante : Estudante Paulo VI identifika fatór haat kontribui hamosu inundasaun

Vise-Ministru Obra Públika, Nicolau Lino Freitas Belo, hateten tinan-ne’e, iha faze finál atu halo estudu impaktu ambientál no planu saneamentu iha kapitál Dili atu hahú konstrusaun iha 2021.

“Projetu ba sistema drenajen no saneamentu ne’e importante atu hamenus inundasaun no kria ambiente ne’ebé saudavel ba abitante tomak iha sidade Dili,” Vise-Ministru Nicolau Lino Freitas Belo, informa  ba Agência Tatoli, ohin, iha Parlamentu Nasionál.

Vise-Ministru Nicolau Lino Freitas Belo nota katak hafoin udan iha tersa  kalan (08/12), hamosu inundasaun iha área Suku Bairru Pité no Comoro nian, nune’e MOP hosi diresaun Nasionál Estrada, Ponte no Kontrolu  Cheia halo koordenasaun ho Institutu Jestaun Ekipamentu (IGE) hasa’e sedimentasaun iha mota no drenajen sira atu prevene inundasaun.

Tuir nia haree, kada tinan inundasaun iha kapitál Dili mosu kauza mai hosi sidade dez-organizadu no sistema drenajen kloot.

“Ita presiza atu halo hanesan abitasaun, edifikasaun no bandu komunidade sira atu hela iha mota ibun no tasi ibun atu iha 2021 ita hahú projetu Dili drenajen,” nia informa.

Governu liuhosi grupu tékniku hosi komisaun interministeriál, hahú sosializa implementasaun planu mestre ba mapa liña projetu ezekusaun drenajen no saneamentu iha kapitál ba autoridade lokál no komunidade ne’ebé afetadu iha sidade Dili.

Komisaun liña interministeriál ne’e, kompostu hosi Ministériu Finansa (MF), Ministériu Justisa (MF), Ministériu Agrikultura no Peska (MAP), Sekretaria Estadu Protesaun Sivíl (SEPS), ne’ebé prezide husi Ministériu Obra Públika (MOP), bazeia ba despaixu Primeiru-Ministru, Taur Matan Ruak, ho númeru 034/L/7/2019.

Estudu planu mestre ba drenajen no saneamentu iha kapitál Dili hosi konsultór Austrália hahú iha 2011 no 2012 no iha 2013 to’o 2017 hala’o ona melloramentu planu ba kanál drenajen sira iha kapitál Dili.

Projetu kanál drenajen finansia hosi doadór Millennium Challenge Corporation (MCC) atu apoiu iha bee no saneamentu iha Dili, ne’ebé Governu haree prioridade atu implementa iha 2021.

Kustu estimasaun planu mestre ba implementasaun projetu drenajen no saneamentu iha Dili ne’e hamutuk millaun $300-resin, ne’ebé MCC apoia fundu millaun $200-resin.

Projetu ne’e afeta  kuaze uma-kain 600-resin, ne’ebé liña ministeriál halo ona identifikasaun atu halo re-apropriasaun.

Tuir kreximentu demográfiku iha Dili laran aas hahú hosi 2005 to’o 2010, kuaze porsentu 1,5 no 2010 to’o 2015 ho porsentu 15. Daudaun ne’e tun ba porsentu 9-resin tanba ho konstrusaun barak entaun área ba bee atu halai menus ba beibeik.

Projetu ne’e rasik iha faze finál ba planu mestre no dezeñu detalladu ne’ebé mak hala’o hosi Água de Portugál (AdP) no Governu mós halo ona kustu estimativa no hahú tama ona faze preparasaun ba prosesu resentimentu.

Projetu ne’e hanesan planu asaun ida atu atinje meta Planu Estratéjiku Dezenvolvimentu Nasionál (PEDN) 2011 to’o 2030 ne’ebé Timor-Leste nia populasaun sai prósperu, saudavel, seguru no forte.

Jornalista  : Florêncio Miranda Ximenes

Editór        : Francisco Simões

HAKEREK NO HATÁN

Please enter your comment!
Please enter your name here