Timor-Leste konklui enkontru virtuál ho komunidade ekonómika ASEAN. Imajen/MNEC

DILI, 10 dezembru 2020 (TATOLI) — Timor-Leste toma nota ona ba komentáriu-sira hosi lider ofisiál seniór-sira iha komunidade ekonómika ASEAN (EAC/ASEAN Economic Community) no sei servisu maka’as liután hodi prienxe nasaun nia obrigasaun-sira iha pilár ekonomia nia okos.

Notísia Relevante : TL hola parte iha enkontru virtuál komunidade ekonómiku ASEAN

Timor-Leste partisipa iha enkontru virtuál komunidade ekonómika ASEAN. Imajen/MNEC

Liuhosi enkontru virtuál komunidade ekonómika ASEAN (EAC/ASEAN Economic Community) ba loron ikus, kuarta (09/12), Timor-Leste mós aprezenta nia estratéjia polítika hodi asegura katak nasaun sei preparadu ba tranzisaun ne’ebé di’ak ba ASEAN nia ekonomia.

Enkontru virtuál ne’ebé hala’o durante loron tolu, hosi loron 07 to’o 09 dezembru ne’e, Timor-Leste kompleta ho susesu ho lider ofisiál seniór-sira iha komunidade ekonómika ASEAN (AEC), konsellu asesoria negósiu ASEAN, ofisiál sira hosi korpu sektorál ASEAN no Sekretariadu ASEAN.

Nota imprensa ne’ebé Agência Tatoli asesu, ohin, hosi Diresaun Jerál ba Asuntu ASEAN iha Ministériu Negósiu Estranjeiru no Kooperasaun (MNEC), informa katak Timor-Leste apresia tebes enkontru virtuál ne’ebé  prezide hosi Vietname ne’e, liuliu ba oportunidade hodi aprezenta nasaun nia prontidaun téknika ba maluk-sira iha ASEAN maski ho situasaun atuál saúde globál ne’ebé ladún favorese.

Enkontru ne’e kria espasu ida ba fahe hanoin no observasaun ne’ebé di’ak no produtivu entre ASEAN no Timor-Leste kona-ba progresu no planu ba futuru iha Timor-Leste nia polítika ekonómika sira.

Nota komunikadu ne’e haktuir mós katak, liuhosi enkontru virtuál komunidade ekonómika ASEAN nian ne’e, Timor-Leste partilla informasaun kona-ba oinsá nasaun nia polítika no estratéjia-sira planu atu aliña ho ASEAN nia aspirasaun-sira, no simu sujestaun ne’ebé di’ak kona-ba oinsá nasaun bele enderesa lakuna-sira ne’ebé agora daudaun eziste iha nia dezenvolvimentu.

Timor-Leste hein ho ansiozamente ba enkontru tuir-mai ho Konsellu Asesoria Negósiu ASEAN iha inísiu 2021, hodi fahe koñesimentu ne’ebé kle’an liu-tan kona-ba nasaun nia setór privadu.

“Ami hein katak enkontru ne’e sei fornese Konsellu Asesoria Negósiu ASEAN ho kompriensaun ne’ebé di’ak liután kona-ba dinámiku-sira ne’ebé eziste iha Timor-Leste nia setór privadu, atu nune’e parte rua bele servisu hamutuk hodi kria oportunidade ba negósiu foun,” haktuir pozisaun Timor-Leste nian iha komunikadu ne’e.

Enkontru virtuál AEC ne’e hanesan pasu importante ida ba Timor-Leste nia adezaun ba ASEAN. Timor-Leste asegura ba maluk sira iha ASEAN katak nasaun nafatin komitidu atu atinje jornada ne’ebé di’ak ba adezaun. Ho konkluzaun hosi enkontru virtuál AEC ne’e, TL sei hein mós atu simu maluk sira hosi misaun exploratória ASEAN nian iha Dili iha tempu badak nia laran bainhira situasaun permite.

Finalmente, Timor-Leste fó agradese ba Vietname ba nia lideransa iha 2020, no hein ho ansiozamente atu kontinua TL nia jornada ba adezaun durante Brunei nia prezidénsia iha 2021.

 Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here