Loron dahuluk ba enkontru virtuál entre komunidade ekonómika ASEAN no Timor-Leste. Timor-Leste nia delegasaun aprezenta kona-ba nasaun nia prontidaun téknika no apresia ASEAN nia SEOM Lider sira, ofisiál sira hosi Korpu Sektorál ASEAN nian, Konsellu Asesoria Negósiu ASEAN, no Sekretariadu ASEAN ba sira-nia sujestaun no pergunta-sira liga ho Timor-Leste nia prontidaun. Enkontru Virtuál ne’e hanesan pasu importante ida ba Timor-Leste nia jornada ba adezaun ba ASEAN. Imajen/MNEC

DILI, 07 dezembru 2020 (TATOLI) – Mezmu jornada adezaun Timor-Leste nian ba ASEAN (Association of Southeast Asian Nations) sei iha prosesu laran, maibé Timor-Leste iha ona konsiderasaun mútua hosi Sekretariadu ASEAN nian iha Jakarta hodi konvida Governu Timor-Leste hola parte iha enkontru virtuál komunidade ekonómiku ASEAN nian.

Reuniaun ne’ebé hala’o durante loron tolu ne’e ko’alia kona-ba implikasaun Timor-Leste nia adezaun ba ASEAN hodi partilla mós ho komunidade ekonómiku ASEAN nian.

Enkontru virtuál entre komunidade ekonómika ASEAN no Timor-Leste, segunda (07/12).Imajen/MNEC

“Hahú loron 07 to’o 09 dezembru ne’e, ita partisipa iha reuniaun virtuál ho komunidade ekonómiku ASEAN nian. Enkontru ne’e koordena mós ho ofisial ekonomia sira, nasaun 10 iha ASEAN no Banku Dezenvolvimentu Aziátiku. Enkontru ne’e sei prezide hosi Prezidente ASEAN nian,” informa diretora jerál asuntu ASEAN, Milena Rangel ba jornalista-sira, ohin, iha edifísiu MNEC, Dili.

Nia dehan, haree ba situasaun saúde global nian ofisial ekonómika seniór ASEAN nian prezide reuniaun refere liu hosi virtuál no Timor-Leste nia partisipasaun ho ministériu relevante-sira no agência sira hodi kompleta informasaun ba relatóriu avaliasaun ne’ebé prepara hosi Banku Dezenvolvimentu Aziátiku (ADB)  no ASEAN sekretariadu hosi implikasaun Timor-Leste nia adezaun ba ASEAN liuliu ba akordu ekonomia-sira.

Durante enkontru partisipante-sira sei haree  fila fali Timor-Leste nia resposta preliminariu ne’ebé mak haruka ona ba ASEAN. Tanba ne’e, Milena Rangel aprofunda katak, enkontru ne’e sai hanesan pasu importante ba Timor-Leste nia adezaun ba ASEAN.

“Enkontru ne’e sei fornese plataforma ida ba Timor-Leste nia ministériu relevante, agência-sira no mós setór privadu hodi estabelese koneksaun di’ak ho lider ekonómika-sira iha ASEAN nia laran,” nia esplika

Timor – Leste nia ministériu no agência autónomu hirak ne’ebé partisipa iha reuniaun ne’e mak hanesan, Gabinete Ministériu Koordenadór Asuntu Ekonomia (MCAE), Prezidénsia Konsellu Ministru (PCM), Ministériu Turizmu Komérsiu Indústria (MTCI), Ministériu Finansas (MF), Ministériu Obras Públika (MOP), Ministériu Interior (MI), Ministériu Agrikultura no Peska (MAP), Ministériu Transporte no Komunikasaun (MTC), Sekretáriu Estadu Formasaun Professional no Empregu (SEFOPE), Banku Sentrál Timor-Leste (BCTL), Autoridade Petróleu no Mineral no Agência Promosaun no Investimentu no Importasaun no seluk-seluk tan.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here