DILI, 10 dezembru 2020 (TATOLI)-Komisaun Anti-Korrupsaun (CAC), ohin, tuku 09: 25 Otl, tun direta ba ramu loza Dili Mart nian ida iha Raikotu, Comoro, Dili, hodi bolu obrigatóriu jerente kompañia Dili Mart hodi bele halo identifikasaun.
Notísia Relevante : Sasán Cesta Bázika “fuhuk”, CAC bolu obrigatóriu jestór Dili Mart ho ofisiál MTCI
CAC nia asaun ne’e bazeia ba kódigu prosesu penál 53 pontu ida (1) ne’ebé iha relasaun ho notifikasaun hosi CAC nian ba jerente Dili Mart ho ofisial Ministériu Turizmu, Komérsiu no Indústria (MTCI) atu bele presta deklarasaun kona-ba rezultadu inspesaun ne’ebé ekipa Espesialista Anti-Korrupsaun (EAK) halo iha ramu loza Dili Mart nian ne’ebé distribui sasán “fuhuk” iha programa Cesta Bázika, kuarta (09/12).
Tuir prosedimentu no normas jerál bainhira iha identifikasaun no investigasaun maka iha indísiu ruma kontra Lei maka CAC sei halo auto notísia ba Ministériu Públiku nu’udar na’in ba asaun penal atu halo mandadu detensaun no submete ba primeiru interrogatóriu iha Tribunál primeira instánsia.
Agência Tatoli buka halo konfirmasaun direta ho superiór-sira iha CAC, maibé sira seidauk bele fó klarifikasaun tanba sei iha hela segredu justisa. Maibé informasaun ne’ebé iha mós katak CAC sei halo identifikasaun durante oras 12 no sei halo mós identifikasaun ba jestór prinsipál Dili Mart nian iha bidau, Dili, bainhira iha indísiu forte kontra lei maka sei halo auto notísia ba MP hodi husu mandadu detensaun ba Tribunál para submete ba primeiru interrogatóriu.
Hafoin halo tiha identifikasaun ba jerente Dili Mart, autoridade-sira CAC nian mós sei ba bolu obrigatóriu ofisiál MTCI ne’ebé halo supervizaun ka akompañamentu ba prosesu distribuisaun Cesta Bázika ba komunidade Comoro, horiseik, iha ramu Loja Dili Mart nian iha Raikotu.
Jornalista : Nelson de Sousa
Editór : Francisco Simões
