Produtu Cesta Bázika iha bote Imajen TATOLI/Antónia Gusmão

MANATUTO, 10 dezembru 2020 (TATOLI)—Governu liuhosi Sekretáriu Estadu Kooperativa (SEKoop) halo distribuisaun Cesta Bázika ba populasaun 2.933 iha Suku Lakumesa, Postu Administrativu Lacló, Munisípiu Manatuto.

Notísia Relevante: Xefe Suku Lakumesa husu Governu lori Cesta Bázika to’o aldeia

“Totál benefisiáriu ne’ebé simu produtu Cesta Bázika hamutuk 2.933,” Xefe suku Lakumesa, Filomeno Rodrigues Perreira Cárceres hateten ba jornalista ajénsia TATOLI iha Suku Lakumesa, Postu Administrativu Lacló, Munisipiu Manatuto, ne’e.

Iha fatin hanesan, Sekretáriu Estadu Kooperativa (SEKoop) Elizário Ferreira, hateten ai-han ne’ebé Governu distribui ba komunidade liuhusi programa sesta bázika sai nu’udár parte ida atu bele halo rekoperasaun ka hadi’a fila-fali ekonomia família durante enfrenta situasaun Surtu COVID-19, iha Timor-Leste (TL).

Governante ne’e konsidera produtu iha Cesta Bázika maiória mai hosi baze, komunidade sira fa’an ba kompañia no kompañia sosa, hafoin ne’e mak hodi distribui hikas ba komunidade sira.

“Ida-ne’e parte ida atu rekupera hikas ita-nia ekonomia família no sosiedade,” Elizário Ferreira hateten.

Elizário mós husu ba komunidade ne’ebé simu ona bainhira sente katak fini sei iha, bele oferese fali ba kompañia atu fó fali ba ema seluk, tanba iha fatin seluk hahán ladún to’o duni.

Nune’e mós Prezidente Autoridade Munisípiu Administradór Manatuto, Fernando de Sousa Junior, husu ba komunidade Lacló atu koopera ho Governu nune’e fó susesu ba distribuisaun cesta bázika, nune’e komunidade iha Lacló bele hetan hotu.

“Ha’u husu atu atividade ne’ebé la’o iha Manatuto laran ne’e tenke ho didi’ak, ita bo’ot sira labele rona tun sae. Buat ruma ladún di’ak no la monu ba ita bo’ot sira-nia laran, favór ida hato’o ba autoridade kompetente, ha’u lakohi rona hanesan iha mídia sosiál balun halo oin-oin,” Fernando de Sousa Junior apela.

Suku Lakumesak kompostu husi aldeia lima mak hanesan Aldeia Labubu, Hatukonan, Readodok, Tahagamu ho Nakaleu, ho uma-ka’in hamutuk 654.

Jornalista: Natalino Costa

Editór: Cancio Ximenes

HAKEREK NO HATÁN

Please enter your comment!
Please enter your name here