MANATUTO, 10 dezembru 2020 (TATOLI)—Xefe suku Lakumesa, Postu Administrativu Lacló, Munisípiu Manatutu Filomeno Rodrigues Perreira Cárceres, husu Governu atu hadi’a polítika distribuisaun Cesta Bázika hodi lori to’o ba iha aldeia, nune’e povu iha área rurál bele hetan nia direitu.
Autoridade lokál ne’e hateten, politíka Cesta Bázika ne’e rasik nu’udár programa rekoperasaun ekonómika hodi fó vantajen ba povu, maibé susar uitoan bainhira polítika Governu nian konsentra de’it iha suku no la ba to’o aldeia sira iha área remota.
“Ha’u preokupa ho modelu distribuisaun Cesta Bázika ne’ebé konsentra de’it iha suku. Tanba ita-nia komunidade iha suku Lakumesa iha aldeia rua ne’ebé jeografikamente, komunidade tenke ultrapasa kilometru 19 atu mai iha suku hodi simu Cesta Bázika. Se bele Governu hadi’a netik modelu ne’e atu ita nia povu vulnerável ne’e labele sai vunerável liután,” Xefe Suku Filomeno Rodrigues Perreira Carceres hateten ba Agência TATOLI iha sede Suku Lakumesa, kinta ne’e.
Xefe suku ne’e husu tanba, tuir nia haree katak komunidade balun idade avansadu ona no forsa la to’o atu la’o ho distánsia ne’ebé dook no lori tan sasán barak iha Cesta Bázika nian ba fali uma mós ne’e bele gasata enerjia.
“Husu Governu bele hadi’a mekanizmu ida-ne’e hodi koordena ho kompañia sira atu bele fahe Cesta Bázika tama to’o aldeia sira-ne’ebé dook husi suku,” autoridade lokál ne’e husu.
Kona-ba preikupasaun ne’e, nia dehan, autoridade lokál prontu koordena atu bele fó apoiu ba Governu no kompañia iha prosesu distribuisaun ne’e rasik.
Hatan ba preokupasaun ne’e, Sekretáriu Estadu Kooperativa (SECoop, sigla portugés), Elizário Ferreira, hateten Governu halo kontratu ho kompañia sira hodi responsabiliza distribuisaun sasán Cesta Bázika ba postu administrativu ida empreza ida no sira tenke halo ida-ne’e.
“Atu lori ba to’o komunidade nia fatin, ne’e lalika preokupa tanba ita mesak timoroan. Ko’alia ba malu no kompañia sei lori to’o ba komunidade nia fatin,” Elizário hateten.
Governante ne’e mós fó ezemplu, antes ne’e iha Munisípiu Covalima, Governu enfrenta situasaun hanesan tanba komunidade balun tenke la’o kilometru 40 maibé Governu koordena ho kompañia hodi ba to’o iha aldeia sira.
Jornalista: Natalino Costa
Editór: Cancio Ximenes
