DILI, 03 dezembru 2020 (TATOLI) – Atuasaun membru Polísia Nasionál Timor-Leste (PNTL) na’in-tolu ne’ebé halo ba autór sunu sasán Cesta Bázika iha Postu Administrativu Lacluta, Munisípiu Viqueque, hetan atensaun hosi Provedor Direitu Umanu no Justisa (PDHJ).
Provedora Jesuína Maria Ferreira Gomes, konsidera atuasaun membru PNTL hosi Munisípiu Viqeuque nian ne’e totalmente viola direitu umanu.
Jesuína Maria Ferreira Gomes, informa, delegasaun territorial PDHJ nian iha Munisípiu Baucau halo ona monitorizasaun no rekolla informasaun ho dadus hosi autoridade lokál iha Lacluta ba akontesimentu ne’e hodi prepara ona relatóriu notísia krime atu enkamiña ba Ministériu Públiku (MP) atu foti inisiativa loke investigasaun ba iha atuasaun membru PNTL nian.
“Atuasaun membru PNTL nian iha Lacluta ne’e violasaun ba direitu umanu, liu-liu liga ba direitu ba liberdade seguransa no integridade tanba halo agresaun fíziku ka uza forsa exesiva ne’ebé la tuir lei,” Provedora PDHJ, Jesuína Maria Ferreira Gomes, hateten, ohin, hodi responde jornalista iha Centro Conveção Dili (CCD).
Nia hatutan, atuasaun membru PNTL la tuir regra uza forsa tuir dekretu lei 43/2011 kona-ba rejime jurídiku uza forsa.
Jesuína hateten, atuasaun membru PNTL tenke uza prinsípiu proporsionál nesesáriu haree katak saida mak akontese no saida mak halo.
“Ita haree iha mídia sira fó sai laiha grau ameasa ida ba membru PNTL, maibé sira nia atuasaun uza forsa ne’ebé exesivu tuku no tebe,” nia hateten.
Tuir nia, maske komunidade ka (suspeitu) ne’e halo krime iha dalan legál atu prosesa, maibé labele uza forsa ne’ebé ho atuasaun.
Jornalista: Nelson de Sousa
Editór: Francisco Simões
