Serimónia asinatura akordu entre Governu Timor-Leste ho Institutu Camões atu renova akordu ba formasaun ba jornalista sira. Imajen/Ceftec Timor-Leste.

DILI, 10 dezembru 2020 (TATOLI)—Institutu Camões liuhosi Embaixada Portugál iha Timor-Leste deside renova akordu ne’ebé durante ne’e fó formasaun ba jornalista sira liuhosi projetu Consultória Lingua Para Jornalista (CLJ) ba tinan tolu tan hosi 2021-2023.

Notísia Relevante: SEKOMS no Embaixada Portugal Asina Akordu Prolonga Projetu CLJ

Ministru Asuntu Parlamentar no Komunikasaun Sosiál (MAPKOMS), Francisco Jerónimo, hateten selebrasaun akordu MAPKOMS ho Institutu Camões ne’e nu’udar kontinuasaun akordu anteriór ne’ebé antes asina ona.

“Asina akordu ohin ne’e hanesan kontinuasaun akordu antes ne’e halo hodi kapasita jornalista iha lian portugés no tékniku hakerek notísia iha lian portugés tuir padraun ne’ebé iha,” Ministru Asuntu Parlamrntar no Komunikasaun Sosiál (MAPKOMS), Francisco Jerónimo, hateten ba jornalista sira hafoin asina akordu ho institutu Camões iha Sentru Kulturál Embaixada Portugál, Dili,  kinta ne’e.

Governante ne’e dehan, akordu ne’e depende tanba kuandu Governu Timor-Leste hakarak entaun renova de’it. Tanba ne’e, nia parte dezafia jornalista hotu atu aproveita oportunidade hodi kapasita an hodi hetan esperiénsia hosi oportunidade ne’e. 

Iha fatin hanesan, Embaixadór Portugal iha Timor-Leste, José Pedro Machado Vieira hateten, kooperasaun Governu portugués ho Timor-Leste la’o iha ambiente di’ak tebes, no Portugal kompromete atu kontinua apoia Timor-Leste.

Aleinde ida-ne’e, Formadora Consultora Língua para Jornalista, Profesora Claudia Taveira, hateten akordu ne’e nu’udar kontinuasaun akordu ne’ebé antes Sekretaria Estadu Komunikasaun Sosiál (SEKOMS) halo ona iha 2016 to’o 2020.

“Ohin ne’e, Ministru Asuntu Parlamentár no Komunikasaun asina fali ho Institutu Camões hodi  kontinua fó formasaun ba jornalista liuhosi konsultoria Língua ba jornalista,” Claudia Taveira hateten.

Nia dehan, akordu ne’ebé asina uluk ne’e fó formasaun ba jornalista oinsá hakerek notísia tuir padraun loloos. Maibé, nia dehan, akordu ohin diferente uitoan tanba formasaun ba liu ninian espesifikasaun profisionál nian.

Notísia Relevante: Institutu Camões ho SEKOMS Atribui Sertifikadu ba Profisionaís KomSos 70

Jornalista: Natalino Costa

Editór: Cancio Ximenes

HAKEREK NO HATÁN

Please enter your comment!
Please enter your name here