Projetu “Konsultóriu Língua ba Jornalista” (CLJ-sigla portugés) Parseria ho Camões – Institutu Públiku (IP) husi kooperasaun Língua Portugal no Sekretaria Estadu Komunikasaun Sosiál (SEKOMS), sesta (06/09/2019), atribui sertifikadu ba jornalista na’in 70 ne’ebé mak termina ona sira nia kursu lian portugés. Imajen/Mídia SEKOMS

DILI, 09 setembru 2019 (TATOLI)-Projetu “Konsultóriu Língua ba Jornalista” (CLJ-sigla portugés)  Parseria ho Camões – Institutu Públiku (IP) husi  kooperasaun  Língua  Portugal no Sekretaria Estadu Komunikasaun Sosiál (SEKOMS), sesta (06/09/2019), atribui sertifikadu ba jornalista ho profisionaís komunikasaun sosiál (KomSos) na’in 70 ne’ebé mak termina ona sira nia  kursu lian portugés.

Notísia Relevante : Lian Portugés Importante Ba Jornalista TL

Jornalista Ajénsia Notisioza Timor-Leste, TATOLI.IP, Nelson de Sousa, simu serfitikadu husi Sekretariu Estadu Komunikasaun Sosiál, Merício Juvenal “Akara”. Imajen/Mídia SEKOMS

Formadu nain 70 kompostu husi kursu nivel báziku A1/A2 ema nain 20, nivel intermedium B1 ema nain 21, nivel B2 ema nain 29 ne’ebé partisipa kursu durante oras 200.

Jornalista ho profisionaís komunikasaun sosiál hirak ne’e hala’o sira nia knar  iha  Ajénsia notisioza Timor-Leste TATOLI, Rádiu Televizaun Timor-Leste Empreza Públika (RTTEL,EP), Grupu Media Nasionál (GMN), Dili Post, Sentru Media Investigativu (SMI), Rádiu Komunidade Comoro (RCC-siglá portugés), Rádiu Liberdade no funsionáriu SEKOMS nian balun tan.

Serimónia entrega sertifikadu ne’e hala’o direitamente husi Sekretáriu  Estadu  Komunikasaun  Sosiál, Merício  Juvenal ‘Akara’, akompaña husi Presidente Camões I.P, Ambassador Luís Faro Ramos, Ambassador  Portugal iha Dili, José Pedro Machado Vieira.

Sekretáriu Estadu Merício Akara, husu jornalista sira ho profisionál komunikasaun Sosiál hirak ne’e, atu aplika fila-fali saida mak  durante ne’e aprende  husi formadór sira iha kursu iha sira ida-idak nia servisu fatin.

Nia husu mós atu jornalista timoroan hotu kontinua aprende lingua portugés hanesan lingua ofisiál no lori Governu nia naran SEKOMS agradese ba formadór ho konsultór lian portugés ne’ebé halo esforsu hotu atu fahe matenek iha lian portugés ba jornalista timoroan.

“Kursu ne’e importante hodi kontribui mellor informasaun ho lingua portugés iha territóriu Timor-Leste,” afirma Merício Akara.

Prezidente Camões I.P, Ambassador Luís Faro Ramos afirma, projetu ne’e  importante  tebes ba Timor-Leste, tanba husi formasaun lian portugés mellora liu tan koñesimentu profisionais órgaun komunikasaun sosiál   iha area komunikasaun sosiál relasaun interna no externa país nian.

Aquino Soares Sávio hanesan Jornalista husi  Sentru Media Investigativu (SNI) kontente bele hetan oportunidade hodi tuir formasaun ne’e no sei halo esforsu atu bele aplika matenek ne’ebé sira hetan husi kursu lian portugés ne’e iha sira nia servisu fatin.

Jornalista  : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here