Komisáriu CAC, Sergio Hornai. Imajen Tatoli/Antonio Goncalves

DILI, 09 dezembru 2020 (TATOLI) – Komisaun Anti-Korrupsaun (CAC) deskonfia  mosu infrasaun iha implementasaun programa Cesta Bázika, liuliu relasiona ho kuantidade sasán iha Cesta Bázika la balansu ho valor orsan ba kada ema tenke simu $25,00 ba kada fulan no ba fulan-rua $50,00 kada ema.

Notísia Relevante : Aprovizionamentu akizisaun produtu Cesta Bázika uza modalidade adjudikasaun direta

Membru Governu-sira hamutuk ho dirijente hosi ministériu implementadór distribui Cesta Bázika iha Aldeia Palaka, kinta (05/11). Imajen Tatoli/Natalino Costa

Tuir supervizaun CAC nian iha terrenu identifika katak kompañia fornesedór sasán Cesta Bázika balun oferese sasán nia kuantidade la to’o tuir valor osan $25,00 ka $50,00 ba kada ema.

“Ita identifika buat lubuk haree ba kualidade no kuantidade implementasaun iha terrenu,” Komisáriu CAC, Sergio Hornai, hateten hodi responde jornalista, ohin, iha edifísiu CNE, Colmera, Dili.

Nia hateten, ekipa CAC rekolla ona informasaun preliminariu-sira ne’e hodi kontinua buka nia verasidade ho loloos. Tanba ne’e hafoin finaliza relatóriu monitorizasaun sei fó rezultadu públiku.

Sergio Hornai hateten, CAC kontinua halo akompañamentu ativu ba vijilánsia iha medida prevensaun no investigasaun ninian.

Benefisia povu 

Emprezáriu nasionál, Lourenço de Oliveira. Imajen/Espesiál

Hosi sorin seluk, Lourenço de Oliveira, nu’udar emprezáriu nasionál fó sasin katak, programa Cesta Bázika ne’ebé oitavu Governu inisia fó benefisia direita ba povu Timor-Leste iha faze rekuperasaun ekonomia  iha situasaun impase polítika tinan rua liubá aumenta tan ho pandemia COVID-19.

Lourenço de Oliveira hateten, programa Cesta Bázika ne’e nu’udar apoiu ekonómiku direta ne’ebé Governu halo hodi ajuda povu iha baze, liuliu lori osan ba sira liuhosi sosa sira-nia produtu lokál no fó fila sira-nia sasán ba sira liuhosi programa Cesta Bázika.

“Hosi sorin seluk ha’u haree programa Cesta Bázika ne’e hanesan fó lisaun no korajen ba povu  atu fila ba to’os kuda batar, kuda hare, kuda modo, kuda koto no kuda ai-han seluk tan, tanba Governu prontu ona atu sosa sasán-sira ne’e,” hateten Lourenço de Oliveira, foin lalais ne’e.

Hanesan emprezáriu nasionál, Lourenço Oliveira, haree programa Cesta Báziku ne’e pozitivu tebes hodi kontribui ba polítika rekuperasaun ekonomia nasionál, hahú hosi baze.

Oinsá bainhira povu hotu konsentra ba kuda ai-han mas merkadu la iha? Responde ba pergunta ne’e Lourenço Oliveira lia tun dehan, bainhira produtu lokál barak ona no konsege responde nesesidade nasionál, maka Governu tenke fasilita atu setór públiku bele iha kondisoens kria indústria ki’ik iha postu administrativu no munisípiu-sira.

“Indústria ki’ik ne’ebé ha’u hanoin ne’e, oinsá mak bele halo prosesamentu ba produtu lokál sira sai fali hahán ne’ebé ho nia kualidade atu fornese ba merkadu internasionál ka halo esportasaun,”  Lourenço argumenta.

Jornalista   : Nelson de Sousa

Editór         : Francisco Simões

HAKEREK NO HATÁN

Please enter your comment!
Please enter your name here