Sekretáriu Jerál Fretilin, Marí Alkatiri. Imajen António Gonçalves

DILI, 07 dezembru 2020 (TATOLI)—Partidu Frente Revolusionárian Timor-Leste Independente (FRETILIN) lakohi husik VIII Governu Konstitusionál lideradu Primeiru-Ministru Taur Matan Ruak monu tanba atu hadi’a povu nia moris.

“Liu tiha tinan 18 restaurasaun independénsia, ha’u hanoin sentidu luta libertasaun ba povu agora atu haburas fali ona. Atu haburas ne’e tenke hahú hosi edukasaun, hadi’a sistema saúde. Tenke muda konseitu dezenvolvimentu. Tenke iha polítika dezenvolvimentu ida-ne’ebé bele muda povu nia vida loron-loron nian, ne’e mak atu akontese agora. Tanba ne’e mak FRETILIN lakohi husik VIII Governu atu monu,” Sekretáriu Jerál FRETILIN, Mari Alkatiri ko’alia iha semináriu ho tema “Inavazaun iha Timor-Leste hosi Indonézia iha tinan 1975 hanesan Dezafiu, Opurtunidade no Konkista,” hodi hanoin hikas memoria 7 dezembru, ne’ebé organiza hosi Juventude FRETILIN, iha salaun Comite Central FRETILIN (CCF), Comoro, Dili, segunda ne’e.

Eis Primeiru Ministru ne’e husu partidu polítiku sira tenke rekoñese hodi hakru’uk ba realidade.

Sekretáriu Jerál FRETILIN ko’alia kestaun ne’e tanba situasaun inserteza polítiku halo Governu deside retira proposta OJE 2020 ho montante biliaun $1.995 iha loron 3 dezembru 2019 (faze jeneralidade loron daruak), tanba la estruturadu no inskonstitusionál, ne’ebé kestiona rasik hosi bankada Governu nian.

Nune’e, Governu kumpre rekomendasaun PN nian hodi redús ba biliaun $1,668. Proposta ne’e Governu aprezenta hikas ba PN iha 19 dezembru 2019 no PN hahú debate maibé iha loron ikus faze espesialidade orsamentu 2020 ho montante biliaun $1,668 ne’e la pasa ho rezultadu votasaun a-favór 13, kontra 15 no abstesaun 25.

Ho orsamentu ne’ebé pasa halo Prezidente Repúblika Francisco Guterres “Lú Olo” deside bolu partidu asentu parlamentár sira atu fó solusaun ba inserteza polítika ne’e.

Iha parte seluk, partidu neen (6) kompostu hosi CNRT, KHUNTO, PD, UDT, FM no PUDD asina akta koligasaun iha loron sábadu (22/2/2020), iha sede CNRT, Bairro dos Grilhos, Dili.

Akta ne’e asina hosi Prezidente CNRT Kay Rala Xanana Gusmão, Prezidente Partidu Demokrátiku (PD) Mariano Assanami Sabino, Prezidente KHUNTO Armanda Berta dos Santos, Prezidente Ein-Ezersísiu UDT Rodolfo Aparício Guterres, Prezidente Ein-Ezersísiu Frente-Mudansa (FM) Egídio de Jesus no Prezidente PUDD António de Sá Benevides.

Entretantu, Prezidente Repúblika (PR), Francisco Guterres ‘Lú Olo’ simu karta demisaun hosi Primeiru-Ministru Taur Matan Ruak, iha loron domingu (24/2/2020) no Primeiru-Ministru, Taur Matan Ruak rasik deklara karta demisaun ne’e iha loron segunda (25/2/2020).

Maibé Iha loron kuarta, 08 abríl 2020, Primeiru-Ministru, Taur Matan Ruak, retira nia karta demisaun tanba ho razaun surtu COVID-19.

Iha loron 7 marsu 2020 KHUNTO deklara liuhosi Kongresu Nasionál hodi integra ba CNRT iha koligasaun foun.

Iha loron 21 marsu 2020, Sekretariu Jerál FRETILIN Mari Alkatiri no Prezidente Partidu Libertasaun Populár (PLP) atuál Primeiru-Ministru, Taur Matan Ruak, asina plataforma entendimentu entre partidu rua hodi mantein Taur Matan Ruak nu’udar Xefe Governu to’o 2023 no la konkorda Eleisaun Antesipada.

Iha loron 29 fulan-abríl 2020, KHUNTO deklara sai hosi koligasaun foun ho razaun mantein apoia VIII Governu Konstitusionál no respeita Xanana Gusmão maibé KHUNTO hadomi liu povu.

Ho entendimentu partidu tolu ne’e, Prezidente Repúblika, Francisco Guterres “Lú Olo” promulga OJE 2020 iha loron segunta (19/10/2020).

Ba oras ne’e daudaun, proposta-lei OJE 2021 ho montante biliaun $1.895 debate ona iha faze espesialidade.

Ho situasaun hirak ne’e, Alkatiri reafirma, OJE 2020, 2021, 2022 no 2023 sei pasa iha Parlamentu Nasionál tanba partidu sira-ne’ebé asentu parlamentár maioria apoia orsamentu kada programa, só partidu CNRT mak la apoia.

“Ha’u lakohi vingansa. Ha’u lakohi persegisaun. Ha’u lakohi odiu. Maibé, ita-nia funsaun hanesan lideransa atu eduka. Ita tenke eduka hosi leten mai to’o kraik no hosi kraik ba leten. Ne’e mak libertadora, lideransa fundadór no lideransa kontinuadór. Ha’u lakohi buka sai riku tanba riku ona iha ha’u-nia kakutak,” nia dehan.

Notisia Relevante: Rejime Soeharto mak invade Timor-Leste la’ós povu Indonézia

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here