Estudante brillante Julito Miguel. Imajen TATOLI/Memensio Sequeira Freitas.

“Iha ha’u-nia Eskola Sekundária Jeral Liceu 4 de Setembro Viqueque iha ninia lema “Tama ho Mamuk, Sai ho Nakonu” no “ Tama ho Matak, Sai ho Tasak” ne’e mak dudu ha’u hamosu ideia inovativu sira-ne’e iha ha’u-nia kakutak nu’udar kontinuasaun hosi talentu naturál ne’ebé ha’u iha ona dezde ha’u sei ki’ik,” dehan estudante brillante Julito Miguel.

VIQUEQUE, 07 dezembru 2020 (TATOI)—Iha siénsia Talents Mapping, kada ser umanu ida iha talentu barak ne’ebé haksumik iha ninia aan. Talentu hirak ne’e kompostu hosi ida ne’ebé dominante liu to’o ida ne’ebé fraku liu. Talentu ideation, katak talentu ida ne’ebé dominante iha ema ida nia aan, no halo ema refere sai ema intelijente hodi hamosu ideia sira ne’ebé foun no brillante. Nia bele halo konesaun ho buat oioin no demonstra iha kada atividade ne’ebé nia hala’o. Talentu ida ne’e halo ema refere sai inovativu, maduru iha aspetu konseptuál no teoria no nu’udar sentru ba solusaun iha kualker problema ne’ebé mosu iha moris lorloron nian. Talentu ideation halo ema ne’ebé soin ba dóns ida ne’e sai kriativu liu tan hodi explora kapasidade tomak ne’ebé nia iha ba dezenvolvimentu plante ida ne’e nian.

Notísia Relevante: Estudante mileniál hosi Viqueque prodús aviaun

Sira hirak ne’ebé iha talentu dominante ideation, sempre goza sira-nia momentu hotu atu diskute ho livremente no ho ideia sira ne’ebe di’ak tebtebes hodi halo brainstorming ka troka opiniaun entre sira iha grupu laran. Sira sempre iha maneira ne’ebé fasil no simples atu bele esplika mamosuk balun ho sira-nia konseitu rasik. Ema hirak ne’e merese hetan konsiderasaun nu’udar ema kriativu ka intelijente iha sosiedade ida nia leet.

Ó bele dezenvolve rasik ó-nia skill, talentu no kapasidade, maibé ó só bele dezenvolve karáter bainhira ó hamutuk ho ema seluk”. Liafuan murak hosi A. R. Bernard ida ne’e bele sai razaun fundamentál ida ba joven no estudante brillante, Julito Miguel ne’ebé iha ona talentu naturál hodi kria mákina oioin inklui halo avioneta ida ke bele semo momentu balu iha kalohan. Nia konsiente katak talentu naturál ne’ebé nia iha ona seidauk sufisiente atu nia bele halo buat boot tan.

Ho problema ne’ebé nia hasoru bainhira halo avioneta, katak aviaun seidauk bele tuun fila fali hodi para iha fatin ne’ebé nia hakarak, dudu nia atu nia bele kontinua tan ninia estudu iha fakuldade sira ne’ebé bele fornese koñesimentu di’ak liu tan hodi bele ajuda dezenvolve di’ak liu tan ninia talentu ida ne’e. Nune’e, loron ida ninia espetativa atu sai sientista iha área aviasaun bele sai realidade, no nune’e, nia bele kontribui ba dezenvolvimentu ita-nia rai doben Timor-Leste.

Ba edisaun ida-ne’e, kontribuidór Tatoli.IP iha Ossú, Memensio Sequeira Freitas, dala ida tan hasoru malu ho Julito Miguel iha ninia hela fatin, segunda (07 dezembru 2020), atu dada-lia ho joven mileniál ida-ne’e aserka ba ninia kriatividade hodi halo avioneta ida ke bele semo iha kalohan. Dada-lia ida ne’e nu’udar maneira ida atu esplora tan joven mileniál ida ne’e ninia hanoion sira kona-ba sa’ida mak nia halo ona. Ho dada-lia ida ne’e, hein katak parte relevante sira, liuliu Estadu Timor-Leste liu hosi Governu bele buka forma oinsá bele ajuda ita-nia joven mileniál hirak ne’e atu bele asesu ba iha edukasaun ne’ebé aas liután iha área espesífiku ne’ebé bele ajuda dezenvolve di’ak liu tan kapasidade báziku ne’ebé sira iha ona.

Saida mak dudu ita-boot hodi hamosu ideia halo aviaun (avioneta) elikópteru  simples ida-ne’e?

Estudante brillante Julito Miguel. Imajen TATOLI/Memensio Sequeira Freitas,

Mundu ohin loron sai nu’udar mundu kompetitivu, iha ne’ebé ema iha nasaun barabarak hadau malu hamosu produtu sira enjeñaria nia oioin liuhosi siénsia no teknolojia ne’ebé sira aprende iha eskola sira. Ita-nia nasaun Timor-Leste, biar nu’udar nasaun foun ida-ne’ebé sei enfrenta difikuldade barak, maibé ita mós tenke iha ona mehi atu kria rasik ita-nia produtu sira enjeñaria nian inklui aviaun no buat seluk tan, nune’e hatudu ba mundu katak ita timoroan mós bele.

Tanba ida-ne’e mak liuhosi siénsia sira be ha’u aprende ona iha eskola aumenta tan ho talentu naturál ne’ebé ha’u iha, ha’u koko atu hamosu hanoin inovativu ida-ne’e hodi kria avioneta ida ne’e para depois ba oin bele dezenvolve di’ak liután. Sé mak hatene, iha futuru, ha’u ka ema seluk ruma bele dezenvolve halo didi’ak no bele hamosu duni aviaun ida nu’udar produtu timoroan sira-nian rasik? Hanoin hirak ne’e duni mak sai hanesan motivasaun  boot ida ba ha’u hodi ha’u halo aviaun ki’ik ida-ne’e.

Ita-boot eskola iha ensinu sekundáriu jerál ne’ebé estuda kona-ba tékniku no enjeñaria ne’e uitoan loos ka kuaze laiha. Oinsá mak ita-boot bele iha hanoin ba kriasaun avioneta ida-ne’e?

Loos! Iha eskola sekundária jerál ha’u aprende de’it dixiplina jerál sira no nunka aprende kona ba tékniku ka enjeñaaria nian. Maibé, liuhosi ramu siénsia no teknolojia ne’ebé ha’u hili, ha’u aprende dixiplina espesífiku ka matéria eskollidu sira hanesan matemátika, fízika, kímika, biolojia no jeolojia ne’ebé fornese mai ha’u siénsia lubuk ida ke ha’u no ema hotu ne’ebe estuda ne’e bele dezenvolve iha ninia moris loroloron nian. Nia atu enjeñeiru boot ida mós, konserteza nia tenke domina área sira hanesan matemátika no fízika.

Entaun, embora ha’u estuda iha ensinu sekundária jerál, maibé siénsia sira be ha’u aprende ne’e bele utiliza nu’udar bukae oan ruma atu ha’u bele hamosu buat ruma. Ho ida ne’e de’it mak ha’u konsege hamosu mákina lubuk ida inklui avioneta ida-ne’e. Aleinde ne’e, iha ha’u-nia Eskola Sekundária Jeral Liceu 4 de Setembro Viqueque iha ninia lema “Tama ho Mamuk, Sai ho Nakonu” no “ Tama ho Matak, Sai ho Tasak”. Lema hirak eskola nian ne’e mós mak dudu ha’u hamosu ideia inovativu sira-ne’e iha ha’u-nia kakutak nu’udar kontinuasaun hosi talentu naturál ne’ebé ha’u iha ona dezde ha’u sei ki’ik.

Haree ba ita-boot nia talentu ne’e, ita-boot gosta liu dixiplina ida-ne’ebé durante tuur iha banku estudu ensinu sekundáriu no tanbasá eskolla dixiplina ida-ne’e?

Iha eskola, ha’u gosta liu mak dixiplina eskollidu sira hanesan fízika no matemátika. Iha fízika bele ajuda aumenta hanoin ho sistemátiku, subjetivu no kreativu, katak iha fízika mak ita estuda kona-ba fenómenu naturál ne’ebé la moris ka matéria iha espasu no tempu. Hosi fízika mós mak ita aprende forsa oioin, inklui forsa sira be eziste iha aviaun ida-nia laran hodi nia bele semo. Enkuantu matemátika nu’udar baze ba siénsia hotu-hotu, bele ajuda ha’u hatene kona-ba mudansa ne’ebé mosu iha mundu.

Oinsá ho ita-boot nia prestasaun estudu durante tinan tolu (3) iha Ensinu Sekundáriu?

Ha’u-nia etudu iha ensinu sekundáriu durante tinan tolu (3) nia laran ne’e ho prestasaun akadémiku ne’ebé natoon. La’ós di’ak liu maibé mós la aat liu. Maibé, ho bukae hosi ensinu sekundáriu ida-ne’e duni mak ha’u sei esforsu aan atu realiza ha’u-nia mehi bainhira ha’u iha oportunidade atu kontinua ha’u-nia estudu enjeñaria iha ensinu superiór aban bainrua.

Kona-ba avioneta ne’ebé ita-boot halo ona, aviaun hira ona mak ita-boot prodús no presiza tempu hira atu halo hotu avioneta ida?

Kona-ba aviaoneta ne’ebé ha’u prodús, ha’u ko’alia loloos de’it katak ha’u foin halo avioenta ida (1) iha tinan 2018 (bainhira ha’u sei tuur iha 10o ano ES) no aprezenta iha komemorasaun Loron Mundiál Siénsia no Matemátika iha Venilale-Baucau. Aviaun ne’ebé ha’u-nia eskola aprezenta iha momentu ne’ebá sai tiha tópiku favóritu ida tuir versaun KNTLU nian. Agora kona-ba tempu atu halo hotu avioneta ida-ne’e depende de’it ba materiál báziku sira-ne’ebé ita presiza hanesan fiu, bateria, lampu-bulaun, vintuña, dinamo,  alteko no kalen alumíniu. Karik sasán sira ne’e ita hetan lalais entaun prosesu kriasaun mós lalais (bele presiza de’it tempu loron ida (1) to’o rua (2).

Estudante milineiál hosi Eskola Sekundária Jerál Públika 4 Setembru Liceu Viqueque, Julito Miguel, prodús manual aviaun ida. Imajen TATOLI/Memensio Sequeira Freitas.

Maibé se kazu materiál sira be ita presiza mak laiha entaun presiza tempu atu ita bele halo hotu. Materiál ne’ebé dala ruma gasta tempu atu ita hetan mak dinamo no bateria tanba ita presiza ba Dili atu hetan sasán hirak ne’e. Aleinde ne’e, aviaun ne’ebé ha’u halo ne’e sei ki’ik ka seidauk bele halo ida boot Tanba aleinde kapasidade ekonomia ne’ebé la sufisiente, ita mós presiza koñesimentu ne’ebé kle’an liután kona-ba oinsá bele kria aviaun boot no ida-ne’e só ita bele hetan iha departamentu espesífiku kona-ba produsaun aviaun nian iha ensinu superiór sira. 

Tuir ita-boot nia hanoin, forsa saida de’it mak serbisu iha avioneta ida-ne’e nia laran mak rezulta nia bele semo?

Aviaun bele semo tanba sustenta mai husi ár (anin), bainhira liras (ventuña) nakdulas makaas hamosu ár (anin) ne’ebé makaas mós, nune’e presaun hosi ár (anin) ne’e bele hiit aviaun no semo. Iha siénsia fízika hateten katak enerjia mekánika ne’e nu’udar rezultadu soma hosi enerjia potensiál no enerjia sinétika. Enerjia potensiál katak enerjia ne’ebé fó forsa no enerjia sinétika katak enerjia ne’ebé bele halo movimentu husi fatin ida ba fatin seluk.

Hosi aviaun simples ne’ebé ha’u halo, enerjia mai hosi bateria hodi fó forsa ba dinamo hodi halo movimentu ne’ebé provoka liras hosi aviaun halo movimentu. Bainhira liras hamosu ár (anin) no hetan mós presaun anin hosi atmosfera. Kapasidade ár (anin) boot liu todan aviaun, ár (anin) hamosu jestu hiit boot liu jestu gravitasaun. Jestu hiit no jestu dudu hamosu aerodinámika ba aviaun nia liras (aerodinámika katak akontese interasaun  entre ár (anin) ho aviaun nia liras). Hosi enerjia mekánika ne’ebé mai hosi enerjia potensiál aumenta tan ho enerjia sinétika. Forsa mai hosi ár (anin) muda enerjia potensiál bainhira semo hamosu enerjia sinétika.

Difikuldade saida de’it mak ita-boot hasoru durante prodús aviaoneta ne’e?

Difikuldade ba ha’u atu halo aviaun simples mak susar atu hetan sasán hanesan bateria, dinamo, fiu kiik, IC no selu-seluk tan. Bainhira sasán sira-ne’e monta ba mai balu to’o ahi han tanba enerjia boot liu nia kapasitasaun. Ikus liu ha’u bele deskobre katak aviaun simples ne’ebé ha’u halo uza Bateria volt 24,  Dinamo volt 20 no aviaun nia liras bele tetu karik zero virgula. Susar ba ha’u tanba ha’u laiha mákina tester atu deteta sasan aat ka di’ak. Maibé, ha’u ho pasiénsia koko no koko nafatin to’o hetan rezultadu.

Entre difikuldade hirak ne’e, ida-ne’ebé mak sai nu’udar difikuldade boot liu no seidauk hetan solusaun to’o agora?

Difikuldade boot liu ne’ebé ha’u enfrenta no to’o agora seidauk bele rezolve mak aviaun ne’e  konsegue semo maibé ha’u seidauk iha kapasidade oinsá aviaun refere bele tuun fila fali atu para iha fatin ne’ebé ha’u hakarak. No ba ida-ne’e, ha’u tenke fera ulun fila ba fila mai no tanba ida ne’e duni mak ha’u iha mehi atu kontinua ha’u-nia estudu iha área mekánika aviasaun nian.

Hosi esperiénsia nabilan ida-ne’e, bele ka lae se ita-boot kria aviaoneta ida boot liu uitoan hosi ida-ne’ebé halo ona?

Loos! Ida-ne’e mak ha’u-nia mehi. Só ke karik ha’u presiza dinamo ne’ebé mak ho ninia voltajen boot maibé ho ninia massa ki’ik ho Bateria ne’ebé ho nia voltajen aumenta maibé ninia massa kiik. Se ha’u bele hetan karik sasán rua ne’e, ha’u sei koko atu halo ida boot liután. Ha’u-nia problema mak ne’e oinsá bele hetan sasán hirak ne’e?

Ita-boot besik akaba ona hosi Ensinu Sekundáriu, ita-boot nia planu ba oin atu kontinua estudu ne’e halo nusa?

Ha’u iha mehi atu kontinua ba Universidade ne’e aas tebes. Ha’u fiar katak iha Universidade mak ha’u bele hakle’an skill ne’ebé ha’u iha ona.  No ba ida-ne’e, foin dadauk ha’u prenxe formuláriu atu hasesu ba UNTL no ha’u hili Fakuldade Enjeñaria, mekánika eletrónika no Konstrusauno Sivíl. Ha’u espera katak ha’u bele liu iha fakuldade ida-ne’e iha UNTL. Maibé  karik mak lae, ha’u kala mehi de’it ona. Maibé susar atu realiza tanba ha’u nia kondisaun ekonómiku ne’ebé la garante atu ha’u bele kontinua mesak iha universidade privada sira.

Saida mak sai hanesan ita boot nia esperansa atu atinje mehi ne’ebé iha ona?

Ha’u sempre iha vontade, pasiénsia no estuda makaas atu nune’e skill ne’ebé ha’u iha bele buras no bele lori ha’u ba futuru ne’ebé di’ak liu. Ha’u mos iha esperanaa katak ha’u sei kontinua estudu iha universidade ne’ebé bele hakle’an ha’u nia skill naturál ida-ne’e. 

Foin lalais ne’e ita boot hetan oportunidade hasoru SEJD no ha’u rona mós dehan ema barak kontaktu ona ita-boot. Iha karik esperansa ruma hosi kontaktu hirak ne’e? 

Loos! Ha’u hasoru duni Sua Exelénsia Sekretáriu Estadu Juventude no Desportu iha komemorasaun loron proklamasaun nian iha Sentru Juventude Viqueque. Sua Exelénsia husu kona ba ha’u-nia mehi  relasaun ho kreatividade ne’ebé ha’u iha no mós ha’u-nia mehi ba futuru, liuliu edukasaun formál ne’ebé aas liután. Pur ezemplu liuhosi asesu ba UNTL ka dalan seluk tan.

Aleinde ida-ne’e, ema balu kontatu ha’u liu husi Whatsapp no facebook no haruka ha’u halo video atu haruka ba sira. Ha’u halo duni maibe ha’u seidauk haruka tanba nu’udar Estudante, ha’u sei fó uluk informasaun ba ha’u-nia diretór eskola nian no profesór akompañadór atu nune’e buat ne’ebé mak sira husu bele la’o ho organizadu. Aleinde ne’e, ha’u mós lakohi fó sai arbiru buat ne’ebé halo hodi monu sala ba liman aat, nune’e sira utiliza fila fali ba sira-nia interese pesoál.

***

Buat ne’ebé todan liu iha vida mak atu inisia buat ruma. Maibé, buat ne’ebé todan ida mós mak kontinua esforsu atu atinje ita-nia mehi”. Liafuan murak ida ne’e mak serve atu ita hateten ba Julito Miguel ba kapasidade báziku ne’ebé nia iha ona. Ohin nia hamosu ona avioneta ida ke bele semo iha kalohan, maibé problema ba nia mak avioneta refere seidauk bele tuun fali hodi para iha fatin ruma. No, atu rezolve problema ida ne’e, Julito Miguel tenke estuda maka’as liután, fera ulun intensivu liután no dixiplina liu tan iha ninia estudu, atu nune’e, loron ruma, nia la’ós de’it ona halo aviaun ida bele semo mas nia mós bele halo aviaun para iha fatin ne’ebé tenke para ba.

Ida-ne’e klaru ke la’ós buat fasil. Maibé se joven kriativu ida-ne’e iha duni vontade boot mak ita hotu fiar katak loron ruma nia sei konsege atinje nia mehi. Ita hotu hein katak joven mileniál ida ne’e bele sai duni sientista iha área aviasaun no pilotu tuir ninia mehi ne’ebé nia hato’o ona ba Sua Exelénsia Sekretáriu Estadu Juventude no Depsortu bainhira hasoru malu iha Sentru Juventude Munisipiu Viqueque foin lalais.

Notísia Relevante: Bankada FRETILIN husu Governu tau matan ba estudante Julito Miguel

Kontribuidór: Memensio Sequeira Freitas

Editór: Cancio Ximenes

HAKEREK NO HATÁN

Please enter your comment!
Please enter your name here