Estudante mileniál hosi Eskola Sekundária Jerál Públika 4 Setembru Liceu Viqueque, Julito Miguel, prodús manual aviaun ida. Imajen TATOLI/Memensio Sequeira Freitas.

DILI, 03 dezembru 2020 (TATOLI)—Tanba polítika hatuur ema iha sentru sai VIII Governu nia motto, mak Bankada FRETILIN husu Primeiru-Ministru ho membru Governu relevante (Ministériu Edukasaun Juventude no Desportu) atu tau matan ba estudante Julito Miguel hosi Eskola Sekundária Jerál 4 Setembru iha Munisípiu Viqueque ne’ebé ho talentu espesiál ba inventa mákina baku hare, dulas-haré, no halo aviaun semo.

Notísia Relevante: Estudante mileniál hosi Viqueque prodús aviaun

Xefe Bankada FRETILIN, Deputadu Francisco Miranda Branco, hateten VIII Governu Konstitusionál liuliu Ministériu Edukasaun tenke fó apoiu ba estudante mileniál Julito Miguel nia abilidade tanba bele motiva juventude no estudante sira seluk atu aprende no aprende.

”Bankada FRETILIN husu ba Primeiru-Ministru ho membru Governu relevante sira (MEJD), atu tau matan ba estudante Julito Miguel hosi Eskola Sekundária Jerál 4 Setembru iha Munisípiu Viqueque ne’ebé ho talentu espesiál ba inventa mákina baku haré, dulas-haré, no halo aviaun semo.  Oinsá mak estudante ne’e bele hetan apoiu hosi ita-nia Estadu hodi dezenvolve di’ak liután abilidade ida-ne’e, sai ezemplu no bele motiva nia maluk joven estudante seluk,” Xefe Bankada FRETILIN , Francisco Miranda Branco, informa liuhosi debate jeneralidade loron datoluk iha plenária, Parlamentu Nasionál, kuarta ne’e.

Entretantu, ba kontribuidór Agência TATOLI iha Viqueque, estudante mileniál Julito Miguel hateten nia parte konsege rakit modelu aviaun elikópteru ida (avioneta) no aprezenta ona iha World Science Day iha Postu Adminstrativu Venilale, Munisípiu Baucau, iha tinan 2018 liubá ne’e.

“Ha’u konsege rakit aviaun ida no ha’u hatudu tiha ona liuhosi World Science Day iha Venilale iha tinan 2018 liubá. Aviaun ne’e, bainhira ha’u START (halo moris) tiha, nia semo kedas. Soké, nia labele para iha fatin ne’ebé ha’u hakarak atu nia para. Nune’e, bainhira fila hosi Venilale, ha’u komesa estuda hosi mídia no referénsia oioin, no liuhosi estuda durante kuaze fulan tolu (3) nia laran kona-ba remote control. Entaun, ha’u konsege hetan duni rezultadu maibé aviaun refere seidauk konsege para iha ninia pozisaun ne’ebé ita hakarak nia tenke para iha fatin ne’e,” Estudante Milineiál, Julito Miguel, haktuir ba Agência TATOLI iha nia eskola fatin, sesta (27 novembru 2020) ne’e.

Halo avioneta ne;e, nia haktuir, nia instala liuhosi utiliza fali sasán simples ka sasan uzadu sira hanesan dinamo hodi liga ho pilla tuir kapasidade no voltajen hanesan ho dinamo refere. Nia dehan, aviaun ne’ebé nia instala ona ne’e utiliza de’it sasán restu sira-ne’ebé nia bele hetan fasilmente iha fatin-fatin sein gasta bintés (osan) ida atu hola materiál sira-ne’e.

Aleinde prodús aviaun, nia esplika, nia dehan, bainhira nia iha idade tinan 14 (5o Ano EBC), nia hahú ona ho kreatividade sira hanesan halo kareta kiik-oan ba halimar, motor, aviaun simples ruma no mákina simples ruma.

Estudante milineiál hosi Eskola Sekundária Jerál Públika 4 Setembru Liceu Viqueque, Julito Miguel, prodús Mákina Ko’a Kripik no Mákina Dulas Kafé. Imajen TATOLI/Memensio Sequeira Freitas.

“Bainhira ha’u tuur ona iha eskola primária (5o Ano), ha’u komesa intensiva liután prodús mákina oioin. Neste momentu, bainhira ha’u iha ona eskola sekundária, ha’u konsege halo ka rakit mesak mákina sira hanesan Mákina Dulas Nuu, Mákina Ko’a Kripik (fehuk ropa, señoura, ai-farina ka bele mós hudi), Mákina Dulas Kafé. Agora daudaun mós ha’u iha hela preparasaun atu halo motór uza mákina sensor nian. Ba motór ne’ebé ha’u sei prodús hosi mákina sensor nian, ninia dezeñu prontu hotu ona. Maibé, tanba ha’u laiha kapasidade finanseira ne’ebé di’ak entaun sei haree oinsá mak ha’u bele hahu prodúz motór refere,” nia dehan.

Kreatividade hodi halo sasán hirak ne’e, nia hateten, nia esplora rasik hosi nia kakutak no hanesan talentu naturál ka dón ida ne’ebé Maromak moris nia na’in oferese ba nia hodi halo ninia mehi ka kreatividade ne’e sai hanesan obra ida.

“Nu’udar kbiit laek nia oan ida, ha’u foin koñese no utiliza telefone ANDROID bainhira tuur ona iha 12o Ano ensinu sekundária nian. Entaun, mákina sira-ne’e ha’u halo tuir ha’u-nia imajinasaun no inventa de tal forma hodi nia sai duni hanesan buat ne’ebé ha’u hakarak. Ha’u bele dehan katak kapasidade hirak ne’e hanesan dón ida ke ha’u hetan naturalmente hosi Na’i Maromak. Tanba, bainhira ha’u iha 5o Ano eskola primária, ha’u seidauk hatene saida mak internete. Ho interese ne’ebé mai hosi ha’u rasik, se ha’u hakarak halo karik kareta oan ruma, ha’u presiza kalkula tuir ninia velosidade no mós tempu hira mak nia presiza no distánsia hira mak nia sei liu. Entaun, hafoin kalkula tiha kestaun sira-ne’e hotu mak ha’u foin monta kareta tuir kalkulasaun ne’ebe iha,” nia dehan.

Espetativa ba oin, nia esplika, karik mak nia naran sai (liu selesaun ba UNTL ka IPB) mak nia sei kontinua nia estudu iha ensinu superiór no liu selesaun ba Departamentu Enjeñaria ne’e di’ak liután atu nia bele dezenvolve talentu naturál ne’ebé nia iha ona ne’e.

“Mak la liu selesaun karik, ha’u sei la kontinua ha’u-nia estudu tanba ha’u no ha’u-nia família laiha kbiit finanseiru natoon atu ha’u bele kontinua iha ensinu superiór privadu sira iha Dili laran,” nia dehan.

Tanba ne’e, nu’udar estudante milineiál ida iha Timor-Leste, Julito Miguel hato’o mensajen ba estudante no juventude Timor-Leste tomak atu keta haluha estuda no aprende rona jerasaun tuan sira-nia esperiénsia atu aprende buat ruma, no husu ba Ministériu Edukasaun Juventude no desportu atu tau matan ba ninia kreatividade ne’e.

“Ha’u-nia mensajen ba Ministériu Edukasaun Juventude no Desportu (MEJD), ha’u hato’o de’it atu tau matan ba ami-nia kreatividade sira hanesan ne’e. Suporta ami ho finanseira ruma atu ami bele dezenvolve di’ak liután ami nia talentu. Ha’u husu ba MEJD, atu bele tau matan ba ami-nia estudu atu loron ruma ami bele kontribui buat di’ak ruma ba dezenvolvimentu ita-nia rain Timor-Leste nian,” Julito Miguel husu ho fuan.

Entretantu, Diretór Eskola Sekundária Jerál Públika 4 Setembru Liceu Viqueque, Verissimo Marques, rekuñese katak ninia estudante Julito Miguel ne’e iha duni abilidade báziku ka iha talentu naturál atu prodús mákina oioin hodi kontribui ba Liceu Science Group hodi hamorin eskola nia naran iha nível nasionál.

“Labarik Julito Miguel ne’e, nia problema mak nia hanesan kbiit laek ida-nia oan. Entaun, ladún iha kbiit finanseira natoon atu finansia ninia nesesidade eskola nian. Tanba ne’e, dalaruma eskola mak tulun nia, tuir eskola nia beran atu bele tulun estudante refere,” Verissimo Marques hateten.

Iha parte seluk, profesór Helio Faria Guterres nu’udar akompañador ba Liceu Science Group (LSG) reforsa tan afirma katak estudante mileniál Julito Miguel nu’udar estudante potensiál ida iha eskola no iha Liceu Science Group (LSG) laran. “Ami orgullu ho nia tanba nia kontribui makaas loos ba dezenvolvimentu Liceu Science Group ida-ne’e,” Helio Faria Guterres haktuir.

Notísia Relevante: Bankada FRETILIN louva PM Taur ne’ebé tau aas transparénsia no governasaun di’ak

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here