Diretora FOKUPERS, Maria José Guterres. Imajen TATOLI/Osória Marques.

DILI, 04 dezembru 2020 (TATOLI)—Forum Komunikasaun ba Feto Timor-Leste (FOKUPERS) no Asosiasaun Chega ba Ita (ACbit) realiza bazár no semináriu iha edifísiu Faról, Dili ho objetivu atu fó apoiu atividade ekonomia feto sobrevivente no vítma Violénsia Bazea ba Jéneru no konflitu pasadu nian. 

Semináriu no Bazár ne’e realiza iha ámbitu komemorasaun loron Internasionál ba direitu umanu hodi halo kampaña atu elimina Violénsia Bazea ba Jéneru durante loron 16, hahú hosi 25 novembru to’o 10 dezembru.

“Liuhosi semináriu no bazár ne’e atu bele kontinua haforte sira-nia dezenvolvimentu ekonomia, hodi sustenta oan sira-nia moris loron-loron,” Diretora FOKUPERS, Maria José Guterres, hateten lia hirak ne’e ba jornalista sira, iha edifísiu Fokupers, Farol, Dili, Sesta ne’e.

Diretora ne’e esplika, atividade ne’e mós atu bele promove sira-nia produtu no fornese asesu ba espansaun negósiu ne’ebé sira hakarak hala’o.

Tuir nia, iha prosesu prodús no faan produtu ne’ebé sai hanesan meiu prinsipál ba sobrevivente hodi sustenta sira-nia oan nia moris, maibé sira-nia rendimentu la konsisten.

Dadus hosi FOKUPERS hatudu katak, iha asesmentu no análiza merkadu ne’ebé mak hatudu katak, ema na’in-109 hosi 123 feto sobrevivente ne’ebé partisipa iha survei, hakarak dezenvolve sira-nia negósiu ka komesa ho negósiu foun, maibé maioria sira laiha fundu atu sosa material prima hodi dezenvolve sira-nia produsaun.

Entretantu, Diretora ACbit, Manuela Leong Perreira hateten, feto sobrevivente sira baibain faan sira-nia produtu semana ida dala ruma hetan de’it $1 to’o $10.

“Tanba ida-ne’e mak, ami hamutuk ho FOKUPERS hodi realiza asesmentu ka rapid assessment no análiza merkadu tanba feto sobrevivente no vítima sira ne’e, dala ruma hetan de’it $1 to’o $10 kada semana hosi sira-nia produtu lokál,” nia dehan.

Aleinde ne’e, nia dehan, dezafiu ne’ebé mak sira enfrenta barak liu mak limitadu ba asesu merkadu hodi faan produtu, enkuantu kompradór menus ka ladún iha.

Entretantu, ativiadde ida-ne’e realiza tanba hetan apoiu hosi Uniaun Europeia no organiza hosi Hivos hodi suporta no oportunidade ba feto sobrevivente hamutuk 23, ne’ebé reprezenta hosi munisípiu hitu hanesan Dili, Ainaro, Baucau, Ermera, Liquiça Manufahi no Rejiaun Administrativa Espesiál Oé-Cusse Ambeno (RAEOA) mak faan sira-nia produtu lokál.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here