DILI, 04 dezembru 2020 (TATOLI)-Eis Prezidente Komisaun Funsaun Públiku (CFP), arguidu Liborio Pereira, ohin, tuku 12:30 Otl, hetan libertasaun hosi Tribunál Distritál Dili (TDD) hafoin kumpre detensaun oras 72 iha sela Servisu Investigasaun Kriminál (SIC), Kuartél Jerál Polísia Nasionál Timor-Leste (PNTL).
Notísia Relevante : Liborio Pereira submete ba primeiru interrogatóriu ho hatais roupa detidu
Liuhosi julgamentu primeiru interrogatóriu ne’ebé prezide hosi Juiza Maria Solana, Ministériu Públiku (MP) reprezenta hosi Prokuradora Lidia Soares, liberta arguidu Liborio Pereira, hodi fila ba uma hein desizaun Tribunál nian, sábadu aban (05/12), tuku 11:30 Otl.
Ministériu Públiku nu’udar na’in ba asaun penál akuza arguidu Liborio Pereira ho krime partisipasaun ekonomia no negósiu ne’ebé deskonfia durante asume pasta hanesan prezidente CFP iha tinan hirak liubá.
Kona-ba faktu akuzasaun sei aguarda hela tanba iha hela segredu justisa faze investigasaun. Nune’e, Defensór Públiku, Sergio Quintas, ne’ebé fó asisténsia legál ba arguidu Liborio Pereira hateten, razaun Tribunál ordena nia kliente hodi sai hosi detensaun tanba kompleta ona detensaun oras 72.
“Julgamentu primeiru interrogatóriu ohin Tribunál ordena imediata liberta tiha ona arguidu bele fila ba uma tanba prazu detensaun liu tiha ona oras 72 no aban mak mai rona desizaun primeiru interrogatóriu iha TDD iha tuku 11:30 dadersán hodi rona despaxu juis nian,” Sergio Quintas lia tun ba jornalista hafoin audiénsia julgamentu iha TDD.
Iha faze alegasaun, MP husu Tribunál atu aplika medida koasaun todan uitoan ba arguidu liu-liu provizaun auzénsia atu labele sai hosi territóriu nasionál hodi submete ba investigasaun hodi haree ba faktu ne’ebé MP imputa ba.
Enkuantu parte defeza husu mós atu aplika medida adekuadu no proporsionál atu aplika Termu Identidade Rezidénsia (TIR) ba arguidu.
Sergio Quintas, esplika, antes ne’e MP notifika arguidu to’o dala-rua atu presta deklarasaun iha MP, maibé arguidu la marka prezensa tanba halo tiha dezlokasaun ba rai-li’ur hodi hala’o servisu externa diplomata nian ne’ebé nia hala’o .
“Foin lalais nia halo rekerimentu ida ba MP nu’udar titular ba asaun penál kona-ba nia dezlokasaun ba estranjeiru tanba dalaruma MP preokupa ho nia dezlokasaun ne’e keta nia ba rai-li’ur la fila tan mai ho ida ne’e mak MP husu rekerimentu mai Tribunál kona-ba mandadu detensaun hodi detein arguidu,” Sergio Quintas hateten.
Jornalista : Nelson de Sousa
Editór : Francisco Simões