Primeiru-Ministru, Taur Matan Ruak. Imajen Tatoli/Egas Cristovão

DILI, 04 dezembru 2020 (TATOLI)– Parlamentu Nasionál, ohin, aprova iha faze espesialidade alokasaun Orsamentu Jerál Estadu (OJE) 2021 ho montante millaun $12,750 ba Gabinete Primeiru-Ministru (GPM).

Notísia Relevante : Orsamentu Prezidénsia Repúblika aprovadu iha espesialidade

Liuhosi diskusaun iha faze espesialidade ba proposta OJE tinan fiskál 2021 nian, membru PN sira aprova orsamentu ba GPM ho votu a-favór 44 kontra 0 no abstensaun 0.

Alokasaun orsamentu inisiál  ba GPM millaun $10,5, fahe ba kategoria saláriu no vensimentu $506.233, bens no serbisu $3.208.489, kapitál menór $334.252, kapitál dezenvolvimentu $315.000, no transferénsia públika $5.902.580. Maibé, iha debate espesialidade, mosu proposta hosi deputadu proponente-sira hodi aumenta tan $2,075,000 tanba ne’e sa’e tiha ba millaun $12,750 liuliu verba ba Gabinete Apoiu Sosiedade Sivíl atu apoiu ba grupu rezisténsia, harii monumentu Proklamadór RDTL, Saudozu Francisco Xavier do Amaral iha Turiskai.

“Ho nune’e Orsamentu ba Primeiru-Ministru no alterasaun sira ne’ebé introdús iha Parlamentu Nasionál pasa,” prezidente Parlamentu Nasionál, Aniceto Longuinhos Guterres, deklara hafoin votasaun espesialidade ba orsamentu GPM iha  plenáriu PN.

Iha proposta orijinál Orsamentu Jerál Estadu (OJE) ba tinan fiskál 2021, Gabinete Primeiru-Ministru (GPM) sei korresponde ba programa boot haat iha governasaun, hanesan reforma estratéjika Estadu, apoiu sosiedade sivíl, planeamentu, monitorizasaun no avaliasaun, no programa ikus mak boa governasaun no reforma institusionál.

Aleinde ne’e sei aloka verba balun ba medida prinsipál setór hitu iha proposta OJE 2021 ba GPM.

Tuir livru orsamentu, medida prinsipál setór hitu maka hanesan reforsa governasaun liuhosi reuniaun regulár konsellu ministru, partisipasaun iha PN, asegura sólidu reforma lejizlativa responsavel pontu vista fiskál no reforsa relasaun esterna liuhosi Asosiasaun Nasaun Sudeste Aziátiku (ASEAN, sigla inglés) no Komunidade País ho lian Portugés (CPLP, sigla portugés).

Promove pás no seguransa iha territóriu liuhosi sistema koordenasaun integradu ba ekonomia lokál, promove reforma iha área planeamentu, monitorizasaun no avaliasaun hodi fortalese prosesu alokasaun rekursu públiku bazeia ba rezultadu foti desizaun.

Asegura kontinuidade promosaun reforma estratéjika Estadu, promove abordajen integrada reforma liuhosi supervizaun reforma jestaun finansa públika inklui reforma fiskál iha administrasaun públika, hodi konstrui administrasaun públika ida efisiente no efikás, apoiu kontinuamente sosiedade sivíl hodi halo promosaun inkluziva hodi dezenvolve nasaun no ikus liu reforsa boa governasaun no jestaun institusionál.

Jornalista   : Florencio Miranda Ximenes

Editór        : Francisco Simões

 

HAKEREK NO HATÁN

Please enter your comment!
Please enter your name here