Imajen/Media PN.

DILI, 04 dezembru 2020 (TATOLI)—Proposta orsamentu hosi Prezidénsia Repúblika ho montante $8,661,486.00 aprovadu iha espesialidade. Orsamentu ne’e inklui proposta alterasaun ho rezultadu votasaun a-favór 43, kontra 0 no abstensaun 0.

Papél Prezidente Repúblika nu’udar Xefe Estadu, símbolu no garante independénsia nasional, unidade Estadu no regula funsionamentu instituisaun demokrátika. Prezidente Repúblika nu’udar mós Komandante Supremu Forsa Armada nian.

“Orsamentu ba Prezidénsia Repúblika aprovadu,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária Parlamentu Nasionál, sesta ne’e.

Prezidénsia Repúblika propoin orsamentu millaun $8,661,486 ba tinan fiskál 2021. Montante orsamentu ne’e koloka ba saláriu no vensimentu rihun $967,472, bens (sasán) no servisu rihun $6,815,250, kapitál minór rihun $408,756, kapitál dezenvolvimentu rihun $ 220,000, transferénsia públika rihun $250,008.

Bazea ba livru 2 (Planu Asaun Anuál) deskreve medida prinsipál setoriál ba tinan fiskál 2021 hamutuk lima (5) mak hanesan kontribui hodi  reforsa identidade nasionál, liuhosi apoiu promosaun língua Tétum no Portugueza, no afirmasaun valór rezistésia no valorizasaun patrimóniu nasionál. Medida refere sei gasta orsamentu rihun $ 584,306 ne’ebé prevee iha bens servisu no kapitál minór.

Daruak, promove no defende Estadu Direitu Demokrátiku, liuhosi koezaun no  prestíjiu defeza no seguransa, no halo promosaun direitu umanu. Medida ida-ne’e ho montante orsamentu millaun $1,218,326 ne’ebé koloka iha bens servisu no kapitál dezenvolvimentu.

Datoluk, reforsa relasaun internasionál no diplomátika, liuhosi vizita ba nasaun sira no organizasaun multilateral sira. Medida ida-ne’e sei gasta orsamentu rihun $920,168 ne’ebé kolokadu iha bens servisu.

Dahaat, promove dezenvolvimentu sustentável, dezignadamente liuhosi diálogu ho Prezidente Repúblika (Dada-lia ho Lu Olo), halo promosaun no apoiu polítiku ba dezenvolvimentu ekonómiku sustentável, no apoiu prezervasaun ambientál no rekursu naturál. Medida refere gasta rihun $373,001 ne’ebé deskreve iha bens servisu.

Dalima, reforsa boa governasaun no jestaun institusionál Prezidénsia Repúblika nian. Medida prinsipál setoriál ida-ne’e gasta millaun $ 5,565,685 ne’ebé prevé hotu iha saláriu vensimentu, bens servisu, kapitál minór, kapitál dezenvolvimentu no transferénsia públika.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here