Ministru Prezidénsia Konsellu Ministru, Fidelis Manuel Leite Magalhães. Imajen Tatoli/Egas Cristovão

DILI, 04 dezembru 2020 (TATOLI)- Orsamentu Jerál Estadu (OJE) 2021 ba Ministru Prezidénsia Konsellu Ministru (PCM) ho montante millaun $10,267 aprova hosi Parlamentu Nasionál iha faze espesialidade.

Notísia Relevante : PN aprova orsamentu GPM milloens $12,750 iha espesialidade

Montante orsamentu ne’e koloka ba saláriu no vensimentu $521,840, bens (sasán) servisu $4,400,807 no kapitál menór $100,000.

Rezultadu votasaun ba orsamentu PCM a-afavór 35, kontra 0 no abstensaun 0. “Ho nune’e orsamentu ba Prezidénsia Konsellu Ministru pasa,” tenik Prezidente Parlamentu Nasionál, Aniceto Longuinhos Guterres, ohin, hafoin votasaun iha plenáriu Parlamentu Nasionál.

PCM nu’udar departamentu sentrál Governu nian ho misaun presta apoia ba Konsellu Ministru no ba Primeiru-Ministru, promove koordenasaun interministeriál Governu nian.

Medida prinsipál setoriál hosi PCM ba 2021 mak kuida komunikasaun institusionál Governu nian, informa ba sosiedade sivíl kona-ba atividade governamentál, promove sidadania, asegura monitorizasaun no halo akompañamentu ba entidade públika ne’ebé tutela iha PCM.

PCM mós kontinua prioritiza divulgasaun autos ofisiál no fornesimentu produtu, servisu ba setór públiku no privadu liuhosi Imprensa Nasionál Timor-Leste (INTL-sigla portugés).

Apoia mós elaborasaun projetu inovasaun administrativa ba Governu Eletróniku (eGovernment) no halo tradusaun kona-ba desizaun judisiál no dokumentu divulgasaun lei no halo konsulta públika.

Aleinde ne’e, konsentrasaun mós ba atribuisaun matéria reforma lejizlativa, prosesu lejizlativu no reforma administrativu.
PCM sei reforsa boa governasaun no jestaun institusionál no servisu tutela-sira, promove nesesária parseria no kapasita rekursu umanu.

Iha tinan 2020, PCM aprezenta estimativa forsa traballu serka 74 pesoa, 12 kargu diresaun xefia inklui funsionáriu na’in-ualu nomeasaun polítika, bazeia ba Dekretu-Lei 27/2016, no ajente administrasaun públika atuál na’in-13.

Jornalista   : Florencio Miranda Ximenes

Editór         : Francisco Simões

HAKEREK NO HATÁN

Please enter your comment!
Please enter your name here