Reitór UNTL, João Soares Martins. Imajen Tatoli/Tomé Amado.

DILI, 03 dezembru 2020 (TATOLI)—Reitór eleitu Universidade Nasionál Timor Lorosa’e (UNTL), João Soares Martins, hateten nia iha ona planu prioridade lubuk ida atu dezenvolve instituisaun públiku ne’e, durante ninia mandatu tinan lima komesa 2021-2026.

Planu dahuluk ne’ebé maka atu implementa oinsa hadi’a jestaun institusionál, depois fortalesimentu jestaun administrasaun UNTL, fortalesimentu misaun UNTL nian maka ensinu, peskiza no servisu ba komunidade.

Notísia Relevante :João Martins eleitu ba Reitór UNTL

“UNTL mak laiha jestaun ida di’ak maka sei labele oferese kursu, presta servisu ida di’ak iha iha instituisuan nia laran no mós iha komunidade,” nia dehan hafoin eleitu iha Kampu Enjinária UNTL Hera, ohin.

Nune’e mós sei reforsa fortalesimentu Sentru Investigasaun no peskiza iha Institutu Nasionál Linguistíka, sentru formasaun avansadu, hadi’a rekursu finanseira, hadi’a infraestrutura, rekursu umanu.

Aleinde ne’e, rejíme kareira, bolsa estudu, reforsa kooperasaun ho parseiru internasional sira, garante kualidade institusionál no ikus liu mak fó atensaun ba fakuldade sira.

“Ida ne’e mak programa prioridade ne’ebé ha’u iha ne’ebé atu realiza iha tinan lima nia laran ne’e. ha’u fiar katak ho apoiu ekipa retoriál ne’ebé mak sei mai hamutuk ho ha’u inklu estrutura husi fakuldade sira ne’ebé mak estabelese ona sei kolabora hamutuk para bele lori UNTL atinje ninia progresu,” tenik tan.

Notísia Relevante :Ema na’in ualu konkore ba vaga Reitór UNTL

Jornalista : Tomé Amado

Editór:Agapito dos Santos

HAKEREK NO HATÁN

Please enter your comment!
Please enter your name here