Reitór Universidade Nasionál Timor Lorosa’e (UNTL), Francisco Miguel Martins. Foto: media UNTL

DILI, 17 novembru 2020 (TATOLI)—Reitór Universidade Nasionál Timor Lorosa’e (UNTL), Francisco Miguel Martins, informa Konsellu Jerál UNTL tuir planu iha semana oin sei halo eleisaun ikus ba Reitór UNTL foun ba periodu 2021-2026.

Nia hateten antes ne’e, kandidatu hamutuk na’in ualu maka hatama sira-nia aplikasaun hodi konkore ba vaga refere.

Notísia Relevante:Ema na’in ualu konkore ba vaga Reitór UNTL

“Horiseik segunda (16/11/20) kandidatu na’in 4 mak halo ona aprezentasaun programa ne’ebé rezultadu husi kandidatu na’in 4 nian ne’e orsida (17/11/20) lokraik mak fó sai,” nia informa ba Jornalista sira iha edifísiu Fakuldade Enjinária Hera Dili, tersa ne’e.

Husi kandidatu na’in ualu ne’e na’in haat sira-nia valór la to’o  tanba ne’e Konsellu Jeral UNTL  elima ona no tuir planu sei elimina tan na’in ida, depois kandidatu na’in tolu maka sei avansa ba votasaun ikus ne’ebé maka  sei hala’o iha semana oin.

“Loloos ne’e aban (kuarta 18/11) realiza ona votasaun finál maibé tanba kestaun tempu la to’o atu hala’o akta de reuniaun formalizasaun no lejislasaun entaun adia fali ba semana oin,” nia dehan.

Kandidatu nain hitu husi UNTL ho grau akadémika Doutoramentu, no kandidatu na’in ida seluk la’ós maihosi UNTL.

“Hanesan sidadaun no ema ne’ebé harii UNTL iha kompromisu no mós iha responsalblidade etíka, polítika hakarak halo di’ak liután ba universidade ne’e, tanba ne’e ha’u nafatin konkore iha vaga ne’e no no tama hamutuk ho kandidatu na’in rua seluk iha faze finál,” nia hateten.

Entretantu, Reitór UNTL atuál ninia mandatu sei ramata iha loron 18 fulan-janeiru 2021 tanba asume ona mandatu durante periodu ida hahú 2016 to’o 2021.

Enkuantu, tuir rezultadu selesaun dokumentu ne’ebé maka Tatoli asesu husi UNTL, tersa ne’e katak  husi kandidatu na’in ualu ne’e maka João Martins ho valór 40, Francisco Miguel Martins ho valór 35, Acacio Amaral ho valór 34, Antero Bendito ho valór 33, Eduardo Serrao  ho valór 30, Edmundo Viegas ho valór 28, Vicente Paulo Correia ho valór 28, no Valentin Ximenes  ho valor 24.

Jornalista : Tomé Amado

Editór :Agapito dos Santos.

HAKEREK NO HATÁN

Please enter your comment!
Please enter your name here