Deputadu Francisco Branco. Imajen/TATOLI

DILI, 03 dezembru 2020 (TATOLI)—Bankada Frente Revolusionária Timor-Leste Independente (FRETILIN) louva Primeiru-Ministru, Taur Matan Ruak, ne’ebé tau aas transparénsia no governasaun di’ak.

”Bankada FRETILIN louva Primeiru-Ministru, Taur Matan Ruak, nia prinsípiu ne’ebé tau aas transparénsia no boa governasaun (governasaun di’ak), ho orsamentu tuir programa, ezekusaun orsamentu sei foka liu ba rezultadu no kualidade, la’ós ba kuantidade ho persentajen,” Xefe Bankada FRETILIN, Deputadu Francisco Miranda Branco, informa liuhosi debate jeneralidade loron datoluk iha plenária, Parlamentu Nasionál, kuarta ne’e.

Xefe Bankada FRETILIN ne’e haktuir, uluk Ministra Finansa iha tempu AMP nian, Emília Pires fó-sai kada dolar $1 hosi OJE, 75% mak semo ba tasi balun no 25% mak hela iha rai laran.

Nune’e iha VII Governu Konstitusionál Ministru Finansa, Rui Gomes mensiona katak kada dolar $1 hosi OJE 80% mak semo ba tasi balun no 20% mak hela iha rai-laran.

Tanba ne’e Bankada FRETILIN apresia tebes VIII Governu nia estratéjia hodi inverte siklu ida-ne’e, atu persentajen boot liuhosi osan ne’ebé aloka iha OJE sirkula iha rai laran.

Bankada FRETILIN konsidera VIII Governu Kontitusionál lori mós naha ida todan hodi fó kontinuidade ba Estadu Timor-Leste ninia ezisténsia. Katak, la’ós de’it kria programa inovativu hodi responde ba situasaun atuál maibé lori mós responsabilidade hodi rezolve problema ne’ebé eransa hosi governasaun sira uluk nian, hanesan Ró Haksolok no Ponte Habibie.

Nune’e mós projetu 143 no projetu ho karatér emerjénsia sira-ne’ebé laiha estudu viabilidade no laiha kontratu, selu dívida kombustível ba kompañia Esperansa Timor Oan (ETO) ho SACOM, buka solusaun ba kazu Light House, Ponte Naval Hera no kazu adjudikasaun direta seluk, ezemplu hanesan projetu SNC (Sistema Nasionál Kadastru).

Bankada FRETILIN enkoraja VIII Governu lideradu Primeiru-Ministru, Taur Matan Ruak, atu ho firmeza no konviksaun, biar la rezolve buat hotu maibé bele fó solusaun ba problema balun, no implementa mós prioridade ne’ebé define iha OJE 2021.

Xefe Bankada FRETILIN ne’e fiar VIII Governu Kontitusionál lori Naroman, lori esperansa foun ba povu doben, hahi ema maubere nia dignidade, valoriza agrikultór nia kosar-been.

”Ema mak sai alvu ka sentru ba polítika dezenvolvimentu, hatuur-hikas povu maubere nia dignidade tuir povu ida-ne’e merese, polítika ida-ne’ebé nanis kedas no to’o ohin loron FRETILIN nafatin defende,” Xefe Bankada FRETILIN ne’e louva.

Tanba polítika hatuur ema iha sentru sai VIII Governu nia motto, mak Bankada FRETILIN husu Primeiru-Ministru ho membru Governu relevante sira, atu tau matan ba estudante Julito Miguel hosi Eskola Sekundária Jerál 4 Setembru, iha Munisípiu Viqueque ne’ebé ho talentu espesiál ba inventa mákina baku hare, dulas-hare, halo aviaun semo.

”Oinsá bele hetan apoiu husi ita-nia Estadu hodi dezenvolve di’ak liután abilidade ida-ne’e, sai ezemplu no bele motiva nia maluk joven estudante seluk,” Xefe Bankada FRETILIN ne’e fó hanoin ba governu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here