Anin boot sobu ESTV Malibaca Munisipiu Bobonaro. Imajen/espesial.

DILI, 03 dezembru 2020 (TATOLI)—Anin no udan boot (tufaun) ne’ebé akontese mazu menus tuku 15:25 Otl; iha Munisípiu Bobonaro, iha tersa (02/12) konsege sobu sala Eskola Sekundária Tékniku Vokasionál Malibaca, Suku Holsa Postu Administrativu Maliana Munisípiu Bobonaro hamutuk sala 11.

Anin sobu ESTV Malibaca Maliana, Munisipiu Bobonaro.Imajen/espesial.

Diretór Eskola Sekundária Tékniku Vokasionál Malibaca, Januario Lucio Soares, informa anin boot ne’e konsege sobu sala aprendizajen hamutuk neen (6), sala eskritóriu ida, sala komputadór ida, inklui sala foun tolu ne’ebé oras ne’e konstrui hela husi Kompaña Irmaun Sandobe, maibé seidauk entrega ba Governu.

Notísia Relevante :Anin sobu eskola tékniku vokasionál Malibaka

“Anin boot ne’e foufoun maihosi área Tunibibi nian (purvolta killometru tolu) hodi mai to’o eskola iha área soso Maliana hodi sobu eskola,” nia informa ba Tatoli, via telefone kinta ne’e.

Dezastre naturál konsege estraga totál edifisiu eskola rua tanba kalen anin loke hotu kedas, no edifísiu rua loke de’it parte balun.

“Uma rua maka anin loke hotu kedas, maibé uma rua seluk anin loke sorin de’it,” katak nia.

Nia esplika, kazu ne’e mós estraga kadeira hamutuk lima, odamatan ida, enkuantu, komputadór sira iha kondisaun diak hotu maski anin sobu hotu uma kakuluk.

“Hafoin anin loke uma ne’e ha’u haruka ha’u nia funsionáriu, guarda eskola no hetan ajuda husi Bombeiru, asegura komputadór hodi ba rai iha fatin ne’ebé seguru seluk antes udan boot horiseik,”tenik tan.
Ekipa tékniku husi Ministériu Edukasaun Juventude no Desportu Nasionál mós kinta ne’e halo ona prosesu verifikasaun ba estragus ne’e.

Aleinde ne’e, ekipa husi Edukasaun Munisípiu nian, Sekretariadu Munisipál, Servisu Protesaun Sivíl no seluk tan to’o ona iha fatin akontesimentu hodi foti dadus.

Kona-ba prosesu aprendizajen, Ezekutivu husi eskola ne’e esplika, estudante sira feriadu hahú kedas iha loron 25 fulan-dezembru tanba ezame modulár ramata ona.

No prosesu aprendizajen ne’e sei komesa filafali bainhira simu ona kalendáriu husi MEJD.

“Ami sei uza sala ne’ebé sei di’ak no ami sei halo proposta ba MSSI atu ajuda lona ruma atu nune’e fasilita ami bainhira prosesu aprendizajen hahú filafali,”nia hateten.

ESTV Malibaca iha sala aprendizajen hamutuk 27, ho profesór 31, permanente 26, kontratadu 6 no iha estudante 723.

Jornalista: Tomé Amado

Editór: Agapito dos Santos

HAKEREK NO HATÁN

Please enter your comment!
Please enter your name here