DILI, 03 dezembru 2020 (TATOLI)-Akontesimentu udan no anin-boot, kuarta loro-kraik (02/12), iha parte oeste sobu eskola Tékniku Vokasionál iha Suku Holsa, Postu Administrativu Maliana Vila, Munisípiu Bobonaro.
Sekretáriu Estadu Protesaun Sivíl (SEPS), Joaquin Gusmão, relata tuir dadus SEPS nian katak hosi akontesimentu ne’e iha sala de aula ualu mak ninia kakuluk hetan estragu totál.
Ekipa protesaun sivíl liuhosi korpu Bombeiru halo intervensaun direita hodi salva komputadór 17 no fasilidade ne’ebé estudante-sira uza ba prátika iha aula ida ba iha fatin seguru.
Hosi impaktu udan no anin-boot ne’e halo ai-hun boot rua tohar no kuaze atu hanehan Postu Integradu Fronteira Terrestre Batugade. Nune’e, parte Bombeiru halo kedas atuasaun hodi tesi hodi prevene labele fó ameasa ba ema nia vida.
Ahi-han uma ida
Iha horikalan mós akontese inséndiu iha Dili hodi rezulta ahi han uma komunidade ida iha Comoro área kampu Marinir rezulta sasán balun salva no balun la konsege salva, maibé korpu Bombeiru rasik halo esforsu konsege hamate ahi hodi labele alastra tan ba uma seluk ne’ebé besik.
“Tuir dadus ne’ebé relata hosi servisu protesaun sivíl iha territóriu nasionál to’o ohin akontesimentu hirak ne’e mak akontese,” Sekretáriu Estadu Joaquin Gusmão hateten ba Agência Tatoli, ohin, iha nia kna’ar fatin, Caicoli, Dili.
Nia dehan, to’o ohin servisu protesaun sivíl iha baze foin relata relatóriu ba akontesimentu dezastre mai hosi munisípiu sira ne’e no munisípiu seluk seidauk.
Tuir nota komunikadu informasaun balun ne’ebé publika iha pájina ofisiál Facebook Diresaun Nasionál Meteorolojia no Jeofízika Timor-Leste (DNMG-TL) fó sai iha tuku 10:20 Otl, alerta hodi informa ba komunidade ne´ebé mak hela iha rejiaun sira ne´ebé mensiona iha kraik atu toma atensaun ba “risco de tempestade” – (Udan akompaña ho anin boot no rai lakan) ne´ebé iha probabilidade boot atu akontese iha oras hirak tuir mai (durante períodu loraik).
Área sira ne´ebé mak eminente ba tempestade iha loron tomak, ohin, hanesan: Bobonaro, Ermera (Railaco, Atsabe, Letefoho, Hatolia no Gleno), Ainaro (Hatu-Builico, Maubisse, no Hatu-Udo), Aileu, Manatuto (Laclubar, Soibada no Barique) no Manufahi (Turiscai, Same, Fatuberliu no Alas), Lautem (Iliomar), Viqueque (Dilor no Ossu), Manatuto (Laclubar no Soibada), Baucau (Venilale, Baguia) no inklui RAEOA (Pasabe no Oesilo).
Tuir modelu meteorolójiku, observa katak ba rejiaun-sira seluk ne’ebé la mensiona iha leten laiha risku ba tempestade, maibé iha tendénsia udan fraku ba moderadu.
DNMG hakarak husu ba komunidade-sira ne´ebé hela iha rejiaun sira ne´ebé mensiona iha leten atu kontinua atensaun hodi halo movimentasaun iha lurón ba dezastre sira ne´ebé la espera.
Jornalista: Nelson de Sousa
Editór: Francisco Simões
