UPF halo apreensaun ba mina-rai ne'ebé hatama ilegál mai TL iha fronteira terrestre, domingu (29/11). Imajen/UPF

DILI, 01 dezembru 2020 (TATOLI)- Unidade Patrullamentu Fronteira (UPF) halo apreensaun ba mina-rai ne’ebé hatama ilegál hosi fronteira terrestre hamutuk litru 1200 no sigarru ilísitu marka Surya 12 karton ida, inklui fogete kaixa ida ne’ebé negosiante Timoroan balun hatama hosi Indonézia mai Timor-Leste.

Notísia Relevante : UPF halo apreensaun ba ró ilegál tolu

Sasán kontra bandu hirak ne’e, parte UPF halo operasaun no apreensaun bainhira identifika negosiante Indonézia no Timoroan sira hala’o hela tranzasaun ilegál iha tasi área Palaka- Batugade, domingu  kalan (29/11).

Komandante UPF, Superintendente, João Cancho Pires dehan, autór-sira ne’ebé halo tranzasaun mina-rai ilegál hosi parte Indonézia nian, parte UPF la konsege kaptura-sira, tanba sira halai fila ho ró ba Atapupu hodi husik sasán ho negosiante Timoroan balun ne’ebé UPF detein.

“Ita prende mina-rai ilegál ho ró ida hamutuk litru 1200 hamutuk ho sigarru ilísitu ilegál Surya 12 karton ida, fogete kaixa ho marka Dez, no ema na’in-rua ita konsege kaptura, tanba sira ho ró hosi Palaka nian fila tiha ba Atapupu-Atambua,” Komandante UPF, João Sancho informa ba jornalista, ohin, iha Komandu Jerál PNTL, Caicoli, Dili.

Nia hatutan, UPF halo apreensaun mós ba ropa obralan (OB) karon boot 10 ne’ebé negosiante Timoroan balun tenta fa’an ba negosiante-sira hosi Atambua-Indonézia.

Evidénsia hirak ne’ebé UPF halo apreensaun no suspeitu-sira entrega ona ba Komandu PNTL Munisípiu Bobonaro hodi prosesa ba Ministériu Públiku tuir lei.

Detein abitante 38

Durante implementasaun Estadu Emerjénsia (EE) dahituk, parte UPF konsege detein ema na’in-38 ne’ebé hala’o viajen ilegál hosi Atambua-Indonézia tama mai fronteira Timor-Leste.

Ema na’in-38 ne’e kompostu estudante Timoroan na’in-28 no Indonéziu na’in-13. Ema hirak ne’e, UPF detein tiha entrega ba Ministériu Saúde hodi haruka sira hela obrigatóriu iha Kuarentena Batugade no balun transfere ba Dili.

João hatutan, maioria Timoroan sira ne’ebé halo vizaun ho ilegál tanba problema KITAS mate no problema família iha Timor-Leste.

Kona-ba sidadaun Indonézia ne’ebé tama ilegál, parte UPF investiga tiha entrega ba Servisu Migrasaun hodi deporta ba Indonézia hodi evita surtu COVID-19.

Tama ba loron boot Natál no tinan foun 2021, parte UPF kontinua koopera ho F-FDTL, Unidade Polísia Marítima, Unidade Espesiál Polísia (UEP) no Servisu Migrasaun kontinua halo operasaun iha fronteira terrestre no tasi nian.

Jornalista: Eugénio Pereira

Editór: Francisco Simões

HAKEREK NO HATÁN

Please enter your comment!
Please enter your name here