UPF halo operasaun iha liña fronteira terrestre. Imajen Tatoli/Dok

DILI, 01 outubru 2020 (TATOLI)- Hahú hosi janeiru to’o setembru 2020, Unidade Patrullamentu Fronteira (UPF) halo operasaun iha fronteira terrestre no tasi konsege halo apreensaun ba ró ilegál tolu, inklui mina ilegál litru 24,401, ho tua alkóliku litru 375 no masin-midar karon 105.

Notísia Relevante : Komandu PNTL selebra aniversáriu UPF ba dala-XVII

UPF halo apreensaun sasán ilegál hosi negosiante Timor-oan inklui Indonéziu sira balun bainhira hala’o tranzasaun ilegál durante periodu implementasaun Estadu emerjénsia dahuluk to’o agora.

Segundu Komandante Jerál Polísia Nasional Timor-Leste (PNTL), Komisáriu Mateus Fernandes, hato’o parabéns ba progresu servisu ne’ebé UPF hatudu iha ninia misaun patrullamentu no vijilánsia iha fronteira territoriál sira.

“Parabéns iha UPF nia asaun patrullamentu deteta no prende mós ró ahi tolu (3) ho kombustivel litru 24,401, no tua alkóliku litru 375 no  masin-midar saku 105, kilat rakitan ida (1),” informa Komandante Mateus Fernandes, iha selebrasaun aniversáriu UPF ba dala-XVII (30 setembru 2003 – 30 setembru 2020), iha Komandu UPF, Batugade, Bobonaro.

Komisáriu Mateus alerta ba UPF kontinua kria nafatin koordenasaun no kooperasaun ho parte entidade sira hotu, espesialmente ho F-FDTL kontrola movimentu ema no sasán sira iha fronteira territoriál, ho koordenasaun no kooperasaun ho Servisu Migrasaun no Autoridade Aduaneira ka Alfándega.

“UPF presiza mantein disiplina ne’ebé rigorozu vontade sente bolu ne’ebé firme hodi asume responsabilidade ne’e no hametin liután relasaun amizade no instituisaun integradu iha fronteira tantu internal no external,” nia apela.

Nia hatutan, servisu UPF atu aplika lei sira relasiona ho tráfiku umanu, tráfiku droga ilegál, tráfiku kilat no atividade kriminál organizadu sira seluk. Fó seguransa iha aeroportu hodi hala’o patrulla hale’u pista, terminál no aeroportu ho kooperasaun hamutuk ho parte interesada sira seluk no knaar lejítimu sira seluk, tuir nia misaun.

Komandu PNTL rekoñese, servisu barak maka UPF halo ona, maibé sei enfrenta mós dezafiu variavel iha oin sai nu’udar servisu boot ba PNTL no Ministériu Interiór atu kontinua tau konsiderasaun hodi investe iha rekursu no apoia ekipamentu hodi hadi’a kondisaun lori UPF sai polísia profisionál, neutru no iha kualkér servisu.

Komandu PNTL mós agradese durante ne’e UPF hamutuk ho Komandu F-FDTL, Komandu PNTL Bobonaro, Covalima, Oe-Cusse no UEP halo operasaun konjunta konsege detein Timor-oan 390 ne’ebé halo viajen ilegál liuhosi fronteira terrestre no tasi.

Iha fatin hanesan, Komandante UPF, Superintendente João Sancho Pires, apela ba membru na’in-363, kompostu hosi feto na’in-16, mane na’in-347 atu hala’o nafatin sira-nia  servisu iha fronteira terrestre, Bobonaro, Covalima, Oe-Cusse no aeroportu Dili.

Durante periodu Estadu emerjénsia dahuluk to’o agora, UPF rejista abitante sira ne’ebé halo viajen ho dalan legál liu fronteira terrestre hamutuk 1.323.

UPF mós rejista abitante sira ne’ebé tama liuhosi dalan ilegál hamutuk 176 inklui mos membru Grupu Organizasaun Persaudaraan Setia Hati Terate (PSHT) hamutuk na’in-222.

Ema sira ne’ebé UPF detein kumpre tiha kuarentena loron 14 no PNTL Bobonaro sei ba foti hodi halo prosesu investigasaun ba sira hodi aprezenta ba Ministériu Públiku.

Komandante João rekoñese grupu GAM PSHT halo viajen ilegál maka’as, tanba fronteira terrestre no tasi luan susar ba UPF atu deteta sira-nia paradeiru iha tempu kalan no loron.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here