Karreta fuzu-boot transporta sasán Cesta Báziku ba Viqueque baku-fila iha Suku Manehat, Postu Administrativu Natarbora, Munisípiu Manatuto. Imajen/foti hosi Facebook

DILI, 01 dezembru 2020 (TATOLI)–Karreta fuzu-boot privadu ida ne’ebé Sentru Lojístika Nasionál (CLN) aluga hodi tula sasán Cesta Bázika hosi Dili atu ba Munisípiu Viqueque, ohin, purvolta tuku 5:00 madrugada,   baku-fila iha área estrada Suku Manehat, Postu Administrativu Natarbora, Munisípiu Manatuto.

Notísia Relevante : PNTL prosesa ona suspeitu sunu Cesta Bázika iha Lacluta

Asidente tráfegu ne’e rezulta ema na’in-tolu sofre kanek  no sasán Cesta Bázika ho kuantidade tonelada ida-liu hetan estragus.

Administradór Postu Administrativu Barique-Natarbora, Munisípiu Manatuto Evaristo Lima, informa ba Agência Tatoli via telefone, hateten  hafoin akontesimentu, nia parte no autoridade suku kontaktu kedas PNTL hodi salva vítima na’in-tolu, inklui ajuda aruma fila0fali sasán Cesta Bázika hodi rai iha fatin ne’ebé di’ak.

Nia dehan, sasán Cesta Bázika ne’e, parte CLN maka tula hosi Armazein Governu Timor-Leste iha Dili atu lori ba fahe ba populasaun iha Munisípiu Viqueque.

Nia informa, vítima na’in-tolu ne’ebé kanek nu’udar traballadór kompañia nasionál ida ne’ebé oferese ninia karreta ba parte CLN hodi  tula ai-han hirak ne’e.

Iha parte seluk, portavós Komandu Polísia Nasionál Timor-Leste, Superintendente Xefe, Arnaldo de Araújo dehan, parte PNTL halo ona investigasaun ba kronolojia asidente tráfegu  ne’e, inklui halo salvasaun ba sasán-sira ne’ebé hetan estragus hodi rai hamutuk.

Arnaldo dehan, parte PNTL rasik sei halo investigasaun ba motorista hodi buka hatene problema asidente ne’e ninia kauza loloos.

“Ita sei halo investigasaun hela iha terrenu, tanba karreta fuzu-boot ne’e baku fila sasán monu estragus hotu. Ita la hatene problema ne’e kauza hosi estrada aat ka fatór umanu la domina estrada ka fatór karreta mak aat,” dehan Arnaldo ba jornalista, ohin.

Arnaldo hatutan, parte ekipa Governu Timor-Leste liuhosi CLN rasik hamutuk ho PNTL rekolla ona dadus, inklui aruma sasán sira ne’ebé hetan estragus hodi tula fila fali ba karreta seluk.

Jornalista: Eugénio Pereira

Editór: Francisco Simões

HAKEREK NO HATÁN

Please enter your comment!
Please enter your name here