DILI, 01 dezembru 2020 (TATOLI)- Komandu Polísia Nasionál Timor-Leste Munisípiu Viqueque detein no prosesa ona suspeitu ho inisiál JG, tinan 54, ne’ebé sunu sasán Cesta Bázika iha Postu Administrativu Lacluta, Munisípiu Viqueque, segunda (29/11).
Portavós Komandu Jerál PNTL, Superintendente Xefe, Arnaldo de Araújo, informa tuir rezultadu investigasaun ne’ebé PNTL hala’o, suspeitu JG lori gazolina masa-ida maka sunu sasán Cesta Bázika tanba lamenta ho presu sasán.
“Ita halo investigasaun suspeitu JG dehan nia lori gazolina masa-ida sunu sasán-sira ne’e ne’ebé estragus tanba dehan nia la satisfás kustu sasán ne’ebé ita nia governu fahe,” haktuir Arnaldo de Araújo, ba jornalista, ohin, iha Komandu Jerál PNTL Caicoli, Dili.
Hafoin akontesimentu, parte polísia no komunidade konsege rega mate ahi hodi detein kedas suspeitu para aprezenta ba Ministériu Públiku hodi prosesu tuir lei.
Tuir rezultadu investigasaun PNTL hatudu katak la’ós grupu partidu polítiku ruma maka orienta suspeitu hodi halo asaun ne’e tanba suspeitu rasik deklara nia sunu sasán, tanba nia halo protesta kona-ba mina litru-lima ne’ebé parte governu sosa hosi loja distribuidór karun ho presu $8,00.
Hafoin akontesimentu, parte PNTL kontinua akompaña nafatin membru Governu no autoridade-sira kontinua hala’o distribuisaun sasán Cesta Bázika ba populasaun.
Jornalista: Eugénio Pereira
Editór: Francisco Simões
