Advogadu privadu, Pedro Aparício. Imajen Tatoli/Antonio Goncalves

DILI, 30 novembru 2020 (TATOLI)-Tribunál Distritál Dili (TDD)  liuhosi koletivu juis, foin lalais, halo ona alterasaun jurídika ba kazu ró ambulánsia  hosi Ministériu Saúde (MS) ba fali krime administrasaun danoza ne’ebé previstu iha artigu 274 iha kódigu penál Timor-Leste.

Notísia Relevante : Kazu ró ambulánsia, MP alega pena prizaun tinan-ualu ba arguidu sira

“Tribunál  halo alterasaun jurídika ba fali krime administrasaun danoza hodi  anula tiha krime-sira seluk  ne’ebé antes ne’e Ministériu Públiku akuza ba arguidu-sira tanba la relevánsia,” Advogadu privadu, Pedro Aparício, ne’ebé fó asisténsia legál ba arguidu-sira hateten ba jornalista-sira, ohin, iha TDD.

Nia dehan, ho alterasaun ne’e Tribunál halo fila-fali adiamentu ba leitura desizaun iha loron seluk.

Antes ne’e, iha loron 28 setembru 2020, Ministériu Públiku (MP) liuhosi prokuradór titular Rogeiro Viegas, iha nia alegasaun husu ba Tribunál Distritál Dili (TDD) atu aplika pena prizaun efetivu tinan-ualu (8) no selu indemnizasaun sivíl ba arguidu ho arguida hamutuk na’in-ualu (8) tanba iha faktu provadu iha envolvimentu kazu sosa ró ambulánsia iha Ministériu Saúde.

Prokuradór Rogeiro Viegas, hateten, iha MP nia akuzasaun, akuza arguidu ho arguida hanesan AMPM, JFDOC, JCS,LB,ADC, EDJAM, JCM, nu’udar ko-autór material ho forma konsumadu ba krime partisipasaun ekonomia iha negósiu, ne’ebé previstu no punidu iha art°. 299 n°. 1 no 2, hosi Kódigu Penal, ho ninia moldura penal mínimu tinan-tolu (3) no másimu tinan-15 iha prizaun.

MP mós akuza arguidu DG  nu’udar autór material ba konkursu krime falsifikasaun dokumentu ne’ebé previstu no punidu iha art°. 303°, ho ninia moldura penal kastigu mínimu loron 3O ate tinan 3 ka aplika pena multa, no krime burla agravadu, ne’ebé previstu no punidu iha art. 267 n°. 1 a1. a), husi Kódigu Penál, ho ninia moldura penal mínimu tinan-tolu no másimu tinan-10 iha prizaun.

Prosesu ró ambulánsia ne’e Governu liuhosi  MS nian iha 2012, maibé  la konsege utiliza ho di’ak  tanba avaria tiha de’it, tanba ne’e fó prezuiju ba Estadu lakon osan por volta  $414,876.64.

 Jornalista : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here