DILI, 30 novembru 2020 (TATOLI) – Governu Australia fó ona oportunidade ba traballadór Timoroan atu tama hikas ba Australia hafoin surtu Covid-19. Tanba ne’e, kuarta (2/12), traballadór Timoroan hamutuk na’in-162 sei dezloka ba Australia hodi hala’o servisu.
Notísia Relevante : Australia prontu ona atu simu tan traballadór Timoroan
Embaixadóra Timor-Leste ba Australia, Inês da Almeida hateten, sira-nia parte hetan ona konfirmasaun ho aviaun hosi Australia ho marka Qantas mak sei mai transporta traballadór Timoroan sira ba Australia.
“Ha’u hetan ona konfirmasaun, kuarta mai ne’e, aviaun Qantas ne’ebé to’os na’in-sira mak aluga atu ba foti timoroan 162 hosi Timor atu ba servisu iha Tazmánia, Australia,” Embaixadóra TL iha Australia, Inês Almeida, informa ba Agência Tatoli via mensajen WhatsApp, ohin.
Nia dehan, bainhira traballadór hirak-ne’e to’o Tazmánia sei kumpre lai konfinamentu obrigatóriu ka kuarentena durante loron 14 molok servisu.
Traballadór hirak atu arranka ba Australia ne’e sei mobiliza hela hosi Sekretaria Estadu Formasaun Profisionál no Empregu (SEFOPE).
“Ha’u nia intensaun, mak ne’e oinsá ita bele aumenta tan númeru traballadór-sira atu mai ba servisu iha area-sira hanesan to’os no traballadór-sira ne’ebé iha ona abilidade iha administrasaun, otelaria karik bele ba tan iha jestaun. Ita hanoin buat sira-ne’e importante ba rekursu ita nian, entaun ha’u nia servisu iha ne’e oinsá mak atu halo lobi. Tanba lobi iha ne’e difisil tanba iha rai barak mak atu haruka sira-nia ema hanesan Vanuatu, Salomon no seluk tan. Sira mós kompete ho ita. Entaun ita mós tenke haree, ita mós tenke badinas para to’os na’in-sira kontente ho ita no bele husu tan ita-nia traballadora sira para mai,” nia hateten.
Daudaun ne’e iha Australia ne’ebé loke oportunidade ba traballadór Timoroan foin mak Tazmánia, tantu Melbourne no Darwin ho seluk tan seidauk bele simu.
Jornalista : Hortencio Sanchez
Editór : Francisco Simões
