Ministra Negósiu Estranjeiru no Kooperasaun, Adaljiza Albertina Xavier Reis Magno. Imajen TATOLI/António Gonçalves

DILI, 25 novembru 2020 (TATOLI) – Embaixada Timor-Leste iha Australia halo ona esforsu ho Governu Norte Territory Darwin-Australia,  ne’ebé prontu ona atu Timor-Leste haruka tan traballadór Timoroan ba servisu iha Australia.

Notísia Relevante : Kada tinan, UE ajuda millaun $9 ba OJE TL

Iha situasaun propagasaun surtu Coronavirus ka COVID-19, Governu Australia suspende hela atu traballadór Timoroan labele lai tama ba Australia, maibé tuir  Ministra Negósiu Estranjeiru no Kooperasaun (MNEK) Adaljiza Albertina Xavier Reis Magno, katak esforsu Timor-Leste nian liuhosi Embaixadóra Ines Almeida iha Australia konvense ona Governu Australia hodi haruka Timoroan-sira bele ona ba servisu.

“Ita nia Embaixadóra Timor ba Australia,  Ines Almeida, konsege halo negosiasaun  ba iha Norte Territory iha Darwin para ita bele haruka fali ita-nia traballadór-sira ba fali hodi servisu. Entaun, orasida ka aban,  ha’u sei informa ba Sekretáriu Estadu Formasaun Profisionál no Empregu (SEFOPE) katak ita iha ona lampu verde para bele haruka fali ita nia traballadór-sira ba Australia,” Ministra Adaljiza Magno informa ba ba jornalista-sira, ohin, iha Palaçio do Governo, Dili.

Kona-ba total traballadór hira mak Australia presiza, Ministra Adaljiza seidauk bele relata detallu tanba sei iha faze negosiasaun ho Governu Australia hodi bele fiksa loloos nesesidade traballadór Timoroan hira mak Australia presiza tan.

Nia hatutan, prosesu hotu kona-ba traballadór-sira atu arranka ba Australia responsabiliza hosi  SEFOPE.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here