Prezidente ANC, João de Oliveira Freitas, submete ba primeiru interrogatóriu iha Tribunál Distritál Dili, sábadu (28/11). Imajen Tatoli/Nelson de Sousa

DILI, 28 novembru 2020 (TATOLI) –Prezidente Autoridade Nasional ba Komunikasaun (ANC), João de Oliveira Freitas, ohin loraik, submete ona ba julgamentu primeiru interrogatóriu iha Tribunál Distritál Dili (TDD).

Notísia Relevante : Deskonfia, prezidente ANC iha relasaun ho ligasaun internet ilegál

Arguidu João de Oliveira Freitas, to’o iha Tribunál Distritál Dili,  tuku 17:30 Otl,  ho hatais roupa detidu nian no liman “fetu-metin” ho borgol ka aljemas (algemas) hodi tama kedas ba iha sala TDD nian hodi submete ba primeira audiénsia interrogatóriu.

Audiénsia julgamentu primeira interrogatóriu ba prezidente ANC ne’e prezide hosi Juiza  Ercila da Costa, Ministériu Públiku (MP) nu’udar na’in ba asaun penál reprezenta hosi Prokuradór Matias Soares no prezidente ANC hetan asisténsia legal hosi advogadu privadu  Manuel Tilman.

Audiénsia julgamentu ne’e adia fali ba domingu aban (29/11), tuku 15:00 Otl, hodi rona desizaun.

Polísia Nasional Timor Leste (PNTL) liuhosi Servisu Investigasaun Kriminál (SIC), kinta (26/11) purvolta tuku 11:00 Otl,  halo detensaun ba prezidente ANC, João Oliveira Freitas, tanba deskonfia iha relasaun ho ligasaun internet ilegál ne’ebé durante ne’e komete hosi operadór Telekomunikasaun Telemor no kompañia Elite Computer.

Autoridade Polísia Timor-Leste hamutuk ho ekipa konjunta diretamente tama ba edifísiu ANC nian iha Ministériu Transporte no Komunikasaun (MTK) iha Caicoli, Dili, hodi halo buska no detensaun ba prezidente ANC hodi kumpre mandadu buska, detensaun no apreensaun hosi  Tribunál Distritál Dili (TDD) ho NUK 0166/20/PNSIK, nune’e bele submete ba investigasaun no aprezenta ba primeiru julgamentu iha TDD.

Tuir dokumentu ne’ebé sai baze ba SIC hodi halo detensaun ba prezidente ANC ne’e  tanba  deskonfia halo koordenasaun servisu ho suspeitu jestór prinsipál   Elite Computer ho inisiál DP no suspeitu jestór prinsipál  Telemor ho inisiál TVB, hodi halo fornesimentu internet ilegál foti hosi rede Indonézia ba instituisaun Governu Timor-Leste, inklui Komandu Jerál PNTL.

Arguidu-sira ba kazu  ne’e,  deskonfia komete iha krime brankamentu kapitais ne’ebé previstu iha artigu 313, burla informátika  agravadu ne’ebé previstu no punidu iha artigu 269 no krime fraude fiskál  ne’ebé previstu iha artigu 314  kódigu penál Timor-Leste.

Jornalista   : Nelson de Sousa

Editór           : Francisco Simões

HAKEREK NO HATÁN

Please enter your comment!
Please enter your name here