Funsionáriu Telemor Filtec hatudu hela ba Governadór BCTL, Abrãao Vasconselhos, oinsá pagamentu dijitál uza konta e-wallet (Mosan) bainhira sosa sasan, iha Maubisse, sábadu (28/11/). Imajen TATOLI/Antónia Gusmão

AINARO, 28 novembru 2020 (TATOLI)-Banku Sentrál Timor-Leste (BCTL, sigla portugés) kria programa hanaran kampo dijitál, ne’ebé sei halo lansamentu ofisiál aban (29/11) iha postu administrativu Maubisse, munisípiu Ainaro.

Governadór BCTL, Abrãao Vasconselhos, hateten programa ne’e ho intensaun atu promove pagamentu dijitál iha Timor-Leste bazeia ba Planu Dezenvolvimentu Nasionál.

“Banku Sentrál hahú atividade lubuk ida atu promove serbisu finanseiru dijitál, hanesan resposta ba populasaun Maubisse bá servisu pagamentu dijitál,” Governadór BCTL, relata hafoin hala’o abertura espozisaun tranzasaun sosa no fa’an uza konta e-wallet (mosan) no serbisu finanseiru eletrónika iha Maubisse, sábadu ne’e.

Tuir Dirijente banku ne’e, lansamentu sei hala’o aban iha ámbitu komemora loron nasionál poupansa ba dala-neen, ne’ebé kada tinan Banku Sentrál sempre selebra hamutuk ho estudante no komunidade iha fatin ne’ebé de’it.

Nia esplika, kampo dijitál hanesan programa ne’ebé BCTL inisia no tuir loloos implementa iha marsu tinan ne’e, maibé la konsege tanba surtu COVID-19, ne’ebé adia no agora mak foin atu halo lansamentu.

“Programa ne’e ho objetivu hakarak esposta populasaun hotu iha Timór laran tomak, ba servisu finanseira dijitál ka pagamentu dijitál, tanba ne’e Banku Sentrál hakarak promove iha Timor-Leste,” nia akresenta.

Tinan 2021, sei implementa kampo dijitál iha fatin seluk

Postu administrativu Maubisse hanesan fatin dahuluk BCTL implementa sistema ne’e.

“Ami hili fatin ne’e hodi hahú programa ho razaun lubuk ida, aleinde Maubisse hanesan sentru asesu hosi munisípiu tolu (Manufahi, Ainaro no Covalima), no mós hanesan fatin ne’ebé karik iha futuru bele sai hanesan destinasaun fatin turíztiku doméstiku,” Abrãao dehan.

Iha inísiu 2021, Banku Sentrál sei implementa iha fatin seluk, la’ós de’it iha postu administrativu maibé bele tama to’o iha suku sira, nune’e mós Rejiaun Administrativa Espesiál Oé-cusse Ambeno (RAEOA).

Tuir Governadór BCTL, tanba iha alterasaun boot tebes, banku iha obrigasaun prepara populasaun sira adapta iha forma delivery service.

“Kampu dijitál ne’e kada suku ninia forma pagamentu tenke dijitalizadu, ho intensaun hakarak populasaun hahú ho ábitu foun, bainhira iha difikuldade tranzasaun hanesan ba kios ida iha difikuldade troka osan ka atu volta fali osan ba ema sira ne’ebé mak sosa sasán, maka bele uza servisu finanseira dijitál,” nia esplika.

Tuir responsável ne’e, bainhira abitua ho sistema ne’e, sei lori benefísiu barak ba negosiante (kios no sira seluk) ne’ebé iha kapasidade di’ak liu atu kontrola fluxo de caixa (movimentu asesiva).

Programa ne’e ajuda instituisaun finanseira bele intende situasaun  fluxo de caixa kliente, ne’ebé bainhira hakarak asesu ba finansiamentu halo negósiu, bele fasilita di’ak liután tanba instituisaun finanseira sira iha asesu.

Dirijente ne’e dehan, utilizasaun sistema ne’e presiza internet, ne’ebé iha média no longu prazu ninia impaktu sei iha.

Programa hosi BNU no Telemor Fintech

Telemor Fintech hanesan sub-sidiáriu hosi empreza Telemor, ne’ebé envolve mós Telekomcel maibé iha programa ne’e só iha Banco Nacional Ultramarino (BNU) no Telemor Fintech, ne’ebé na’in-rua ninia sistema mak halo konesaun ba malu, enkuantu Banku Nasionál Komérsiu Timor-Leste (BNCTL, sigla portugés), Bank Rakyat Indonesia (BRI) no Bank Mandiri seidauk halo koneksaun ba P24.

“BCTL la’ós atu halo promosaun produtu BNU no Telemor, maibé mai hatudu ba populasaun sira katak iha produtu ne’ebé iha futuru kuandu Telemor halo konesaun ho P24, Banku Sentrál lori sira hanesan BNU no Telemor,” Abrãao Vasconselhos realsa.

Kuandu BNCTL, BRI no Mandiri iha koneksaun ona ho Banku Sentrál, bele fahe informasaun ba populasaun kona-ba produtu.

“Koneksaun konta e-wallet ne’e ho konta bankária, agora permite bele muda osan hosi konta karteira eletrónika ba konta bankária iha banku sira,” nia hatutan.

Nune’e mós, Vise Jenerál Diretór Telemor Fintec, Erick dehan tanba produtu ne’e Telemor Fintech nian, maka sei halo treinamentu ba populasaun sira relasiona ho utilizasaun sistema.

“Tranzasaun hotu halo liuhosi telemóvel, maka bele halo transazaun osan ba banku no banku bele halo tranzasaun ba konta mosan,” nia esplika.

Negosiante lokál apresia ho programa tanba bele ajuda transasaun

Grupu artezenatu foin-sa’e Maubisse ne’ebé partisipa iha espozisaun ne’e sente kontente ho programa ne’e tanba bele ajuda ona sira halo tranzasaun osan.

“Programa ne’e di’ak tanba ajuda komunidade sira labele la’o ba-mai, maski ami seidauk iha koñesimentu tanba sistema ne’e foun, maibé fiar katak sei koopera hamutuk hodi bele la’o di’ak liután,” Prezidente Artezenatu Joven kreativu Maubisse, Graciano Maia dehan.

Tuir nia, vantajen boot liu mak ba joven kreativu sira tanba bainhira ema sosa produtu liuhosi pagamentu dijitál, bele poupa osan.

Entretantu, iha espozisaun ne’e partisipa hosi grupu hamutuk 16, entidade BCTL, BNU, Telemor Fintech, reprezentante Ministériu Koordenadór Asuntu Ekonómiku, autoridade seguransa, autoridade postu administrativu Maubisse no populasaun lokál.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here