Líder Nasionál, Xanana Gusmão ho ekipa, to’o iha Aeroportu Comoro, sábadu (28/11). Imajen TATOLI/Eugênio Pereira

DILI, 28 novembru 2020 (TATOLI)—Líder Nasionál, Kayrala Xanana Gusmão, fila hikas mai Timor-Leste hafoin halo check up rutina saúde durante loron 10 iha ospitál Militár Gatot Soebroto, Sentrál Jakarta, Indonézia.

Iha prosesu tratamentu saúde, ekipa médiku espesialista foti konkluzaun katak Xanana Gusmão nia kondisaun estável no laiha moras boot ruma.

Líder Karizmátiku ne’e to’o iha Areoportu Internasionál Prezidente Nicolau Lobato, Comoro, Dili, iha tuku 13:37 ho aviaun Zet tipu PK-YGR, ne’ebé oferese hosi Indonézia.

Notísia Relevante: Xanana Gusmão hala’o “check up” iha Jakarta

Hafoin tun hosi aviaun, ekipa médiku hosi forsa tarefa prevensaun COVID-19 halo kedan protokolu saúde ne’ebé aplika iha Timor-Leste.

Tuir planu, Líder Rezisténsia no ekipa ne’ebé akompaña ninia viajen sei kumpre konfinamentu obrigatóriu (auto kuarentena) durante loron 14.

Hafoin to’o Aeroportu Comoro, Líder Nasionál, Xanana Gusmão, tuir protokolu saúde no sa’e ba kareta privadu no sei kumpre konfinametu obrigatóriu. Imajen TATOLI/Eugênio Pereira

Tuir observasaun Agência TATOLI iha terrenu, hafoin tuun hosi aviaun, eis Prezidente Repúblika ne’e ho kondisaun saúde estável, sa’e kedan nia karreta privadu hodi kumpre auto kuarentena iha Rezidénsia Balibar, tuir padraun Ministériu Saúde Timor-Leste nian.

Ekipa akompañamentu Xanana Gusmão, ne’ebé hanesan kuadru Partidu CNRT maka, Tomas do Rosário Cabral, Jacinto Rigoberto, Élia Dos Reis Amaral, Alberto P. Carlos no Marcos da Silva, sei kumpre konfinamentu obrigatóriu iha Otél besik Xanana Reading Room, Lecidere, ne’ebé hetan autorizasaun no koñesementu hosi Ministériu Saúde.

Veteranu Rezisténsia no kuadru Partidu CNRT, ho antusiazmu hein Xanana Gusmão iha aeroportu, ho sentimentu kontente tanba fila ho kondisaun estável.

Durante iha Jakarta, Líder Nasionál uza mós oportunidade ba vizita Ministra Negósiu Estranjeiru Indonésia , Retno Lestari Priansari Marsudi, hodi ko’alia kona-ba relasaun Timor-Leste ho Indonezia, liuliu kona-ba fronteira terrestre entre nasaun rua ne’ebé sei iha pontu balun maka pendente.

Xanana Gusmão ho ekipa aranka ba Jakarta iha loron 18 novembru, purvolta tuku 14:00 Otl, ho aviaun alugér, jet privadu ho tipu PK-YGR, hosi Aeroporto Comoro, Dili, ho destinasaun ikus bá Aeroportu Internasionál Halim Perdanakusuma, Jakarta.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here